Miles de persoas participaron este domingo en Santiago de Compostela na manifestación convocada pola Plataforma Queremos Galego para reclamar medidas que garantan a vitalidade do galego e denunciar o que cualifican como unha “emerxencia lingüística extrema”. A protesta, baixo o lema “Lingua vital xa!”, partiu da Alameda compostelá ás 12:00 horas e percorreu as rúas ata a Praza do Obradoiro, onde se leu un manifesto en defensa da lingua.
“OUTRA LECCIÓN DE DIGNIDADE”
O portavoz da plataforma convocante, Marcos Maceira, asegurou que esta nova mobilización serve para “dar outra lección de dignidade ao Goberno galego”, á vez que criticou a reacción da Xunta tras as protestas de novembro. Segundo Maceira, as medidas anunciadas polo goberno autonómico limitáronse a “comisións opacas” sen un “proceso plural e participativo”.
“Se a Xunta quere tomar medidas reais, debe comezar por cumprir os acordos existentes e abrir un diálogo amplo con todos os sectores implicados”, insistiu o portavoz de Queremos Galego.
PONTÓN PIDE “DEIXAR ATRÁS AS POLÍTICAS LINGÜICIDAS”
A portavoz nacional do BNG, Ana Pontón, tamén participou na mobilización e reivindicou que esta marcha “ten que significar un punto e aparte para deixar atrás as políticas lingüicidas do PP”. Pontón acusou ao presidente da Xunta, Alfonso Rueda, de “negar a realidade e manipular os datos oficiais”, e instouno a escoitar a mensaxe da sociedade galega.
“Hoxe é o día de Rosalía e estamos aquí para celebrar o orgullo de ter unha lingua propia. Galicia está en pé para defender que queremos seguir vivindo en galego”, declarou. Ademais, lembrou que xa existe un marco de consenso para a defensa do idioma, en referencia ao Plan Xeral de Normalización Lingüística, que acusou o PP de romper.
BESTEIRO: “SEN LINGUA NON HAI PAÍS”
Pola súa banda, o secretario xeral do PSdeG, José Ramón Gómez Besteiro, sumouse á protesta e pediu ao goberno galego “escoitar a mensaxe clara” da cidadanía.
“Non é unha mobilización contra ninguén, senón a favor da lingua”, afirmou, á vez que reivindicou a necesidade de “protexer, preservar e potenciar” o galego. Besteiro sinalou tamén que a responsabilidade de garantir o futuro do idioma recae na Xunta e instou ao PP a asumir o seu papel na defensa do patrimonio lingüístico galego.
CRÍTICAS Á XUNTA E PETICIÓNS DE CAMBIO
A coordinadora de Queremos Galego, Celia Armas, asegurou que “o galego ten futuro porque o pobo ten dignidade”, e agradeceu o apoio de delegacións de Cataluña, Euskadi e da Rede Europea polas Linguas.
“O único e verdadeiro pacto pola lingua está hoxe aquí, nas rúas, con miles de persoas, centos de colectivos sociais e decenas de concellos comprometidos co galego”, afirmou.
Ademais, insistiu en que a Xunta “sabe como rectificar”, instándoa a cumprir os acordos lingüísticos vixentes e a aplicar medidas concretas no ensino, na cultura e na administración pública.
Entre as voces máis sorprendentes estivo a de Daniel Chapela, excoordinador de Cultura do PPdeG e que dimitiu do seu cargo o pasado mes de novembro, quen criticou que “se exclúan entidades culturais relevantes das negociacións” sobre a política lingüística e pediu que se abandone a inacción neste ámbito.
A manifestación concluíu coa lectura dun manifesto no Obradoiro, onde os organizadores reiteraron a súa petición dun compromiso firme das administracións para garantir a presenza do galego en todos os ámbitos da sociedade.
