A directora xeral de FP, Eugenia Pérez, participou este martes na inauguración do I International Week of Arts and Design da Escola de Arte e Superior de Deseño Mestre Mateo, celebrada na Facultade de Filosofía, onde puxo en valor estas xornadas, que contan cun programa de conferencias, exposicións e actividades de promoción do talento.
“Estamos nun momento no que hai que visibilizar o traballo realizado en Galicia”, subliñou a representante da Consellería de Educación, destacando que “iniciativas como esta reforzan a formación artística e potencian a inserción profesional do alumnado”.
Ademais, reafirmou o compromiso da Xunta coa profesionalización dos estudantes e lembrou que, desde este curso, os ensinos artísticos superiores contan coa gratuidade da matrícula.
O I International Week of Arts and Design conecta a comunidade educativa co sector empresarial. O evento inclúe conferencias internacionais, unha xornada de recrutamento de talento e a Gala Despunte, que chega á súa 15ª edición.
Ademais, promove a internacionalización grazas á participación de docentes e relatoras de países como Albania, Xeorxia, Mozambique, Cabo Verde, Gran Bretaña e Italia. O programa arrincou o luns coa recepción do profesorado Erasmus incoming, seguida do I International Conferences of Fashion Design, onde expertos abordaron as tendencias e desafíos do sector. A sesión contou coa intervención de Marcos Batuecas, directivo de Lacoste; Pedro Mansilla, sociólogo e crítico de moda; e Silvia Scudella, deseñadora multidisciplinar. Esta primeira xornada estivo dirixida ao alumnado e profesorado do Grao en Deseño de Moda.
Este martes foi a quenda do I International Conferences of Product Design, que reuniu especialistas do ámbito do deseño de produto, como Sinézio Mucoque, profesor na Universidade Eduardo Mondlane de Maputo; Paolo dell’Ellce, deseñador de produto en David Chipperfield Architects; e Paula Camiña Eiras, biodeseñadora e enxeñeira de deseño industrial.
A programación continuará o mércores coa Mostra dos Oficios Artísticos. As propias instalacións da escola contarán cun espazo onde centros de secundaria, bacharelato e público xeral poderán coñecer de preto técnicas de fotografía, escultura e xoiaría artística.
O xoves celebrarase a Xornada de Recrutamento de Talento na Cidade da Cultura, onde empresas do sector, entre elas Coosy, O Polbo, Adolfo Domínguez, Paudepedra, Santos e Tecnoloxías Mariñas, entrevistarán alumnado da escola en busca de novos profesionais. A xornada culminará, coa Gala Despunte.
