A Cidade da Cultura acollerá este mércores unha conferencia de Darryl A. McCray, coñecido internacionalmente como ‘Cornbread’, un artista estadounidense considerado o primeiro grafitero contemporáneo e un dos “pioneiros” deste movemento artístico.
Enmarcada na conmemoración do 60 aniversario do nacemento do grafiti moderno, a charla terá lugar ás 17,00 horas no Auditorio 1 do Edificio CINC, onde o artista compartirá a súa historia acompañado por Seor, autora do primeiro grafiti galego pintado en Pontevedra en 1984.
Con este evento, no que as entradas son libres e gratuítas ata completar aforamento, McCray inicia unha xira que o levará por centros culturais de toda Europa, segundo detallou a Consellería de Cultura, Lingua e Xuventude nunha nota de prensa.
Cabe sinalar que Darryl McCray adoptou o seu alcume na adolescencia, en referencia ao pan de millo que lle facía a súa avoa cando el se atopaba nun centro de menores. De feito, cando pintou co seu nome as paredes, “marcou o inicio do ‘tagging’ e do grafiti moderno en 1965, un fenómeno que se expandiu de Filadelfia a Nova York e de aí a Europa e ao resto do mundo”.
Ademais de usar caligrafía “moi característica” ao deixar o seu nome escrito nas rúas, tamén foi un dos primeiros en incorporar elementos que logo se farían populares entre os artistas do grafiti, como as coroas.
