O fotoperiodista premio Pulitzer Emilio Morenatti impartirá unha ‘materclass’ ante uns 700 alumnos de Ensinanzas Artísticas e de Formación Profesional, unha cita que terá lugar en Santiago este mércores, 11 de decembro.

Esta charla celebrarase con motivo do I encontro de Ensinanzas do sector da imaxe de Galicia, Enfócate, que se celebrará en Compostela impulsado pola Consellería de Educación, Ciencia, Universidades e Formación Profesional.

O evento busca dar visibilidade aos programas educativos relacionados co sector audiovisual, imaxe e son, así como compartir formación específica a través de recoñecidas figuras deste ámbito: videógrafos, fotoperiodistas, fotógrafos e blogueros.

Haberá talleres e clases maxistrais de representantes de firmas recoñecidas como Sony, Canon España, Godox Expaña ou Fufijfilm Europe, entre outras. Ademais de Emilio Morenatti, haberá conferencias de Antonio Garci, Carlos Quezada, Dani Díaz, Manuel San Froitos, Mara Saiz, Paco Rocha, Santi Veiga e Tony Martín.

A este encontro asistirán alumnos e profesores dos centros integrados de Formación Profesional CIFP Imaxe e Son (A Coruña), CIFP Audiovisual de Vigo, CIFP A Farixa (Ourense), os Institutos IES Arcebispo Xelmírez I (Santiago de Compostela), IES Saturnino Montojo (Ferrol) e IES Virxe do Mar (Noia) e o catro escolas de arte e superiores de deseño en Galicia: EASD Pablo Picaso (A Coruña), EASD Mestro Mateo (Santiago de Compostela), EASD Ramón Falcón (Lugo) e EASD Antonio Faílde (Ourense)