O Concello de Santiago impulsa un proxecto piloto que “imita á antiga figura do sereno” para facilitar a recepción de mercadorías na zona histórica.
Así o presentou este xoves en rolda de prensa o concelleiro de Mobilidade, Convivencia e Centros Socioculturais, Xan Duro, xunto a representantes da Asociación Hostalaría.gal, Hostalaría Compostela e da Asociación de Distribuidores de Galicia.
O proxecto busca cumprir co establecido na ordenanza municipal de circulación que fixa de 07.00 a 10.00 horas o horario de carga e descarga de mercadorías na zona histórica.
Con todo, engadiu o concelleiro, a realidade é que moitos establecementos de hostalaría abren os seus postos con posterioridade polo que dificulta a repartición e obriga a que algúns hostaleiros conten cunha persoa para recibir as mercadorías.
Desta forma, o novo proxecto piloto establecerá, imitando á “antiga figura do sereno”, a unha persoa que será a encargada de abrir as portas os establecementos participantes para revisar e recibir as mercadorías das empresas de distribución asociadas.
O proxecto piloto, no que participan 12 establecementos da zona histórica, terá unha duración de tres meses e será o Concello o que sufrague, nese tempo, os custos da iniciativa. Tras ese período avaliarán o funcionamento destes traballadores co obxectivo de que se somen máis establecementos.
