O Consello de Goberno da Universidade de Santiago de Compostela reuniuse este luns no Salón Reitoral do Colexio de San Xerome para abordar cuestións relacionadas coa ordenación e planificación académica. Entre os puntos destacados figurou a aprobación do novo Regulamento de Asistencia a Clase nas ensinanzas de grao e mestrado, presentado pola secretaria xeral, Dulce María García Mella.
O regulamento establece que a asistencia a clase será configurada como un ‘dereito e deber’, tal e como recolle o seu primeiro artigo. A programación docente de cada materia determinará as actividades presenciais obrigatorias e a súa avaliación, así como o valor do proceso de aprendizaxe no conxunto da cualificación final. O texto tamén regula a xustificación das faltas de asistencia, atendendo ás especificidades de cada materia.
Segundo a USC, este enfoque busca dar prioridade aos resultados de aprendizaxe e aos coñecementos adquiridos durante a actividade presencial, integrando a asistencia como parte esencial da avaliación continua.
Na xuntanza tamén se aprobou o calendario de Planificación Académica Anual para o curso 2025/2026 e tratouse a actualización do Regulamento de Planificación Académica, adaptado a novas normativas, como a entrada en vigor da Lei Orgánica do Sistema Universitario (LOSU). Entre os aspectos revisados, destacan os criterios para calcular as reducións da capacidade lectiva nas áreas de coñecemento e o recoñecemento de Horas Docentes Equivalentes (HDE) por actividades docentes, investigadoras e de xestión.
OUTROS TEMAS
Ademais, o Consello tratou a adscrición de materias de grao e mestrado a departamentos, así como modificacións non substanciais de memorias de titulacións para o curso 2025/2026. Tamén se avanzaron as declaracións de intencións para modificacións substanciais de titulacións de grao, mestrado e doutoramento que entrarán en vigor no curso 2026/2027.
Entre outros temas tratados, destaca o debate sobre o Regulamento do Traballo de Fin de Grao no Grao en Xestión Cultural, a elección do director en funcións do Departamento de Bioloxía Funcional, e a aprobación de convenios, cursos de estudos propios e informes económicos.
A sesión, segundo destacaron fontes da USC, enmárcase no obxectivo de adaptar a institución aos retos normativos e educativos actuais, ao tempo que se traballa na mellora continua das condicións para o desenvolvemento docente, investigador e administrativo.
