O Concello de Santiago anunciou a posta en marcha dunha campaña de recollida de produtos de primeira necesidade para as zonas afectadas pola DANA (Depresión Aislada en Niveles Altos) en resposta á solicitude da Federación Española de Municipios e Provincias (FEMP), coordinada tamén coa Federación Valenciana de Municipios e Provincias.
A recollida levarase a cabo nas instalacións de Protección Civil no estadio municipal Vero Boquete de San Lázaro. As persoas que desexen colaborar poderán achegar os seus donativos este serán de 18:00 a 21:00 horas e mañá mércores en horario de mañá de 10:00 a 14:00 horas, e de tarde de 17:00 a 21:00 horas.
Atendendo ás necesidades específicas indicadas pola FEMP, demándanse produtos de primeira necesidade, entre os que se inclúen leite, auga, alimentos non perecedoiros, biberóns, cueiros, botas de auga, calcetíns, produtos de hixiene persoal e sacos de durmir.
Desde o concello, instouse á veciñanza a sumarse a esta iniciativa solidaria para amosar o apoio ás persoas afectadas pola DANA e expresaron “o noso pesar polos falecidos e a solidariedade coas familias e persoas que están a sufrir as consecuencias desta traxedia”.
