O Centro de Linguas Modernas da USC ten aberto o prazo de inscrición nas sesións de conversa en inglés e francés para o primeiro semestre do curso 2024/25. O período para matricularse estará dispoñible ata o 21 de outubro e as sesións desenvolveranse en formato en liña a través de videoconferencia desde esa data ata o 20 de decembro.
Estas sesións teñen como obxectivo mellorar a expresión e interacción oral dos participantes. O profesorado especializado do CLM guiará grupos reducidos de máximo catro persoas, onde se traballarán aspectos como a pronuncia, o vocabulario e a fluidez. A duración das sesións será de 40 ou 60 minutos, dependendo do idioma, e cada matrícula cobre un total de 10 horas de conversa.
As conversas están dirixidas ao persoal e estudantado da USC, pero tamén están abertas a persoas maiores de 18 anos que non formen parte da comunidade universitaria. Os niveis ofertados corresponden aos niveis B1, B2 e C1 do Marco Europeo Común de Referencia para as Linguas (MECRL).
Para inscribirse, non será necesario realizar un test de nivel previo para quen xa estea matriculado noutro curso do mesmo idioma no CLM. Para o resto de interesados, será preciso realizar un test de nivel, que poderá ser presencial ou en liña.
