O Centro de Estudos Avanzados de Santiago de Compostela acollerá hoxe, venres 11 de outubro, as Xornadas de Xestión Innovadora da Investigación, un evento organizado pola Universidade de Santiago de Compostela (USC) para poñer en común experiencias e buscar fórmulas que melloren a xestión da investigación no ámbito público. Estas xornadas xorden tras a modificación da Lei da Ciencia, a Tecnoloxía e a Innovación en 2022, que busca aumentar a competitividade do sistema español de ciencia e mellorar a transferencia de coñecemento.
A xornada comezará ás 9:30 horas coa intervención do reitor da USC, Antonio López, acompañado pola vicerreitora de Política Científica, Pilar Bermejo Barrera, e o secretario xeral de Universidades, José Alberto Díez de Castro. Seguiralle o relatorio inaugural a cargo de Javier Ferreira Fernández, catedrático de Dereito Administrativo e xerente da USC, sobre os retos normativos da investigación.
O evento contará tamén con mesas redondas nas que participarán expertos do Consello Superior de Investigacións Científicas (CSIC), do CITMAga e do Instituto Galego de Física de Altas Enerxías, entre outros. Pola tarde, debaterase sobre a transferencia do coñecemento, coas intervencións de representantes das universidades galegas e de entidades como Unirisco e GAIN.
Os interesados en asistir poderán solicitar acreditación a través do formulario dispoñible na web do evento.
