O líder do Partido Popular de Santiago, Borja Verea, destacou no Parlamento de Galicia o papel do Camiño de Santiago como “o mellor instrumento para socializar a riqueza do turismo” e subliñou que esta ruta é un exemplo de turismo sostible, en comparación con outros destinos que concentran os beneficios en poucas mans. Segundo Verea, “o Camiño reparte a riqueza entre miles de familias e pequenos autónomos ao longo do país, revitalizando zonas esquecidas e protexendo o patrimonio natural e cultural”.
Verea tamén resaltou que o Camiño de Santiago non só é a maior vía de peregrinación da cristiandade, senón que mantén unha esencia espiritual e cristiá que o fai único e insubstituíble. “Proba disto é que tentaron copialo noutros lugares, pero non funcionou, porque lles falta esa esencia de transcendencia”, afirmou.
Ademais, o líder popular destacou os datos positivos do modelo turístico galego, apuntando que en 2023 se alcanzaron os mellores niveis de rendibilidade hoteleira da historia, cun incremento do 6% interanual e un 27% respecto aos niveis prepandemia.
Por último, Verea advertiu aos socialistas de non caer na “turismofobia irresponsable” do BNG, afirmando que as súas políticas non buscan combater a masificación, senón limitar o turismo para as rendas máis altas.
