A alcaldesa de Santiago, Goretti Sanmartín, anunciou hoxe os tres grandes retos que o goberno local se marca para o curso político que comeza. Baixo o lema ‘Compostela, orgullosa de se’, Sanmartín destacou que o obxectivo principal é coidar e mellorar o que xa ten o concello, así como asentar as bases para un futuro sustentable e equitativo.
A rexedora subliñou que estes tres retos “non son só un desexo de futuro, senón un compromiso político” co que pretende garantir un mellor benestar para a cidadanía compostelá.
O primeiro reto, titulado ‘unha mellor Compostela onde vivir’, engloba accións relacionadas co acceso á vivenda, mellora da mobilidade, sustentabilidade, mantemento de infraestruturas e espazos públicos. O segundo, ‘continuar xerando oportunidades para o desenvolvemento económico’, céntrase na creación dun nodo loxístico que garantirá a sustentabilidade dos servizos e o apoio ao tecido económico local, fomentando tamén o emprendemento.
Finalmente, o terceiro reto, ‘que a veciñanza sexa o centro das políticas municipais’, busca facer que a Administración sexa “máis amigable” e asegure que os veciños, especialmente os máis vulnerables, sexan “o centro das políticas municipais”.
Durante a rolda de prensa, Sanmartín tamén destacou que “debaixo de cada reto hai proxectos concretos que xa están en marcha ou que se van a desenvolver proximamente”, como a reforma do Estadio de San Lázaro e a intervención no campo de fútbol As Cancelas, entre outros.
Ademais, a alcaldesa anunciou a celebración dun pleno extraordinario este outono para tratar o estado do municipio, co obxectivo de manter á cidadanía “informada” e promover a súa participación activa. “Estamos plenamente comprometidos coa transparencia,” concluíu Sanmartín.
