A concelleira do PP local, María Baleato, expresou a súa satisfacción pola sinatura do protocolo de colaboración entre administracións para a construción dun novo aparcadoiro en altura no Hospital Clínico de Santiago. Baleato destacou que esta iniciativa beneficiará a todos os cidadáns de Santiago, resaltando a importancia da cooperación entre diferentes niveis de goberno.
“Unha boa nova sen ningún tipo de matices, cando dúas administracións colaboran, o que hai que facer é aplaudir, porque os beneficiarios somos precisamente todos os cidadáns de Santiago. Disto vai a política, de mellorar a vida da xente, de facilitarlle a vida á xente,” afirmou Baleato.
A edil da oposición amosouse contenta de que a idea do aparcadoiro en altura, unha das principais propostas do programa electoral de Borja Verea, se fixese realidade. “Como todo o mundo sabe, este aparcadoiro en altura foi unha das ideas principais do programa electoral de Borja Verea, unha infraestrutura que nunca estivera sobre a mesa, que ninguén plantexara e que sufriu moitísimas críticas e ataques polo BNG que hoxe asume,” engadiu.
Baleato tamén subliñou que, aínda que non conseguiron chegar ao goberno, o proxecto estaba dispoñible para ser asumido polas administracións competentes. “Unha vez rematada a campaña electoral e ao non poder chegarmos ao goberno, dixemos que ese proxecto estaba aí a disposición de todas as administracións. Moi contentos de que se asumise a idea de Borja Verea e se traballase e perfeccionase por parte das administracións que teñen as competencias para levalo a cabo.”
“Contentos en definitiva con ese acordo, aplaudimos tanto ao goberno local como á administración autonómica, e moi satisfeitos de que o traballo de oposición teña tamén os seus froitos, que non é o habitual”, concluíu a concelleira.
