O Grupo Municipal Socialista de Santiago reclamou ao Goberno local que implique os representantes do persoal na organización dos traslados previstos ás plantas rehabilitadas do Pazo de Raxoi. A concelleira socialista Marta Abal considera que o proceso se está desenvolvendo con falta de información previa e pediu que calquera cambio que afecte aos postos de traballo se acorde contando co persoal municipal.
Abal precisou que o seu grupo non se opón á reorganización dos servizos municipais nin ao aproveitamento dos espazos rehabilitados, pero considera necesario que as decisións relacionadas coa distribución dos traballadores se aborden previamente cos seus representantes.
“Non cuestionamos que o Concello reorganice os seus servizos”, sinalou a edil, que engadiu que “o que non podemos compartir é que decisións que afectan directamente ao persoal se adopten sen información previa e sen contar desde o principio cos seus representantes”.
Segundo explicou a concelleira, os representantes dos traballadores municipais levan varios meses solicitando información sobre como se ocuparán as plantas rehabilitadas de Raxoi. O PSOE asegura que esas peticións non recibiron ata agora respostas suficientemente concretas sobre a distribución dos servizos ou o desenvolvemento dos traslados.
Para Abal, esta situación forma parte dunha dinámica que o seu grupo xa cuestionou noutros asuntos relacionados coa xestión municipal. “Levamos demasiado tempo vendo como este Goberno confunde informar, cando as decisións xa están tomadas, con dialogar”, afirmou.
Os socialistas piden que a participación dos representantes do persoal se produza antes de pechar as decisións sobre os traslados, especialmente por tratarse dunha reorganización que pode afectar á localización dos postos, á distribución dos espazos e ás condicións nas que se presta o servizo.
A formación tamén puxo o foco na prevención de riscos laborais. Abal reclamou que os delegados de prevención participen no proceso e que, antes de calquera traslado, se comprobe que os novos espazos cumpren coas condicións necesarias para o persoal que vaia ocupalos.
“Calquera traslado debe facerse con todas as garantías, coa participación dos delegados de prevención”, indicou a concelleira socialista, que pediu asegurar previamente “todas as medidas necesarias en materia de prevención de riscos laborais”.
O Grupo Municipal Socialista reclama así ao executivo encabezado pola alcaldesa Goretti Sanmartín que revise a maneira na que está xestionando esta fase da reorganización interna do Concello e facilite información aos representantes dos traballadores antes de avanzar cos movementos de persoal.
Abal resumiu a petición do PSOE en tres cuestións: “diálogo real, transparencia e información”. Ademais, reclamou á alcaldesa “que garanta que ningún traslado se execute sen a participación e as medidas preventivas necesarias”.
