O presidente da Xunta, Alfonso Rueda, negou este martes que o Goberno galego levase meses traballando para facilitar a chegada de Fly2Galicia ao aeroporto de Santiago e situou no Concello compostelán a responsabilidade de explicar os contactos e compromisos que puidesen existir arredor da operación do touroperador.
Preguntado pola polémica xerada nos últimos días, Rueda asegurou que a relación da Xunta con Fly2Galicia se limitou a un “contacto de cortesía, absolutamente informal” e rexeitou que existise por parte do Executivo autonómico unha negociación prolongada para conseguir a implantación do operador en Lavacolla.
“Nós non levamos meses a procurar que ningunha aeroliña, nin esta en concreto, viñese”, afirmou o presidente galego. Neste sentido, apuntou directamente ás declaracións realizadas desde o Goberno de Santiago sobre os traballos desenvolvidos para atraer novas conexións á terminal compostelá.
“Quen dixo que o estaban facendo terá que explicar a que acordo chegou e en que consistía ese traballo”, sinalou Rueda en referencia ao executivo municipal encabezado pola alcaldesa, Goretti Sanmartín.
O presidente da Xunta enmarcou a cuestión na política autonómica para ampliar as conexións aéreas dos aeroportos galegos. Segundo explicou, o Goberno galego mantén contactos de maneira habitual con diferentes actores para tratar de incorporar novas rutas, pero insistiu en que ese labor se desenvolve en coordinación con AENA, organismo que xestiona os aeroportos e que, segundo subliñou, ten a competencia para adoptar as decisións finais.
Rueda engadiu que a Xunta tamén está disposta a colaborar cos concellos e deputacións que queiran participar neste tipo de iniciativas. “Isto deu algúns froitos, e así imos seguir”, indicou.
O presidente autonómico condicionou, con todo, esa cooperación ao marco de actuación promovido pola Xunta. “Quen se acolla a estas condicións, contará coa colaboración da Xunta, tamén das liñas aéreas; quen non o faga, non”, advertiu.
As declaracións de Rueda chegan despois das distintas versións coñecidas arredor do desembarco de Fly2Galicia en Santiago, unha cuestión sobre a que o presidente galego considera que corresponde ao Concello detallar o traballo realizado e os posibles compromisos alcanzados.
“Quen se contradiga, que explique as súas contradicións, se é que existen, que para min son evidentes”, concluíu Rueda ao ser preguntado pola controversia.
Pola súa banda, Goretti Sanmartín anunciou o pasado venres que o Goberno local comparecerá por iniciativa propia no pleno municipal de setembro para ofrecer explicacións sobre a chegada de Fly2Galicia e sobre as actuacións realizadas polo Concello en relación co operador.
