O Grupo Municipal Socialista de Santiago reclamou ao Goberno local do BNG que teña en conta as demandas do Club Natación Cidade de Santiago antes de pechar o reparto definitivo dos espazos e horarios das piscinas municipais entre as entidades que desenvolven actividades acuáticas.
A petición chega despois da recente aprobación das bases que regulan a distribución das instalacións municipais. Segundo trasladou o club ao PSOE, a aplicación dos criterios recollidos nelas podería provocar que a entidade dispoña de menos horas e menos espazo de adestramento que na actualidade.
Os socialistas inciden en que o reparto definitivo aínda non está decidido e consideran que o Concello mantén, polo tanto, marxe para introducir cambios que eviten esa redución. “O Concello está a tempo de actuar”, sinalan desde o grupo municipal.
O PSOE lembra que o Club Natación Cidade de Santiago é o único club de natación da capital galega e conta actualmente con máis de 200 nadadoras e nadadores. Segundo os datos trasladados pola formación, a entidade triplicou o seu número de deportistas desde 2010 e chegou a competir na División de Honra, mentres que na actualidade participa na Primeira División Galega.
Para o grupo socialista, a evolución deportiva e o incremento da base do club deberían ser tidos en conta á hora de organizar o uso das instalacións municipais. “Non sería razoable que unha entidade que medra, que forma cada vez máis deportistas e que compite nas máximas categorías da natación galega acabe dispondo de menos posibilidades para adestrar”, sosteñen.
A formación da oposición reclama así ao Executivo compostelán que abra unha interlocución co club antes de concretar os horarios. “O Goberno municipal ten que escoitar ao club e buscar unha solución, porque solucións hai”, afirma o PSOE, que atribúe ao Goberno local a responsabilidade de presentar alternativas que permitan compatibilizar as necesidades das diferentes entidades usuarias das piscinas.
A demanda socialista céntrase en que o Concello manteña unhas condicións suficientes para os adestramentos do Club Natación Cidade de Santiago, atendendo tanto ao seu volume de deportistas como á súa traxectoria competitiva.
“O que reclamamos é moi claro: que o Concello garanta ao club unhas condicións de adestramento acordes coa súa dimensión, coa súa traxectoria e co nivel deportivo que representa para Compostela”, conclúe o Grupo Municipal Socialista.
