O concelleiro non adscrito de Santiago, Gonzalo Muíños, advertiu das posibles consecuencias que, ao seu xuízo, terá na circulación da cidade o desvío de arredor de 500 frecuencias diarias de autobús cara á contorna de San Roque e do colexio La Salle, especialmente coa proximidade do inicio do curso escolar.
Muíños sostén que a reorganización do tráfico pode provocar importantes problemas nunha zona que xa soporta unha elevada intensidade de circulación. “Advertímolo dende o inicio. A improvisación ía traer problemas graves”, afirmou o edil.
Segundo explicou, a concentración de autobuses e doutros vehículos neste itinerario podería xerar retencións desde San Roque en dirección aos Concheiros unha vez que se recupere a actividade habitual dos centros educativos. “Desviar case frecuencias de 500 autobuses ao día, e todo o tráfico cara a San Roque e ao colexio La Salle, vai crear un embudo que na volta ao cole chegará ata Concheiros”, declarou.
O concelleiro lembrou ademais que unha modificación similar da circulación xa se aplicara durante unhas obras na contorna e que daquela se rexistraran problemas de tráfico coincidindo coa actividade escolar. Para Muíños, este antecedente debería ser tido en conta polo Concello á hora de organizar os novos percorridos.
Neste sentido, considera que o Goberno municipal debe anticiparse aos posibles efectos da medida e revisar a planificación antes de que comece o curso. “Raxoi non pode xestionar a mobilidade con ensaio e erro”, sinalou.
Muíños reclama que, antes de consolidar os cambios, o Executivo compostelán recolla a opinión dos colectivos directamente afectados, entre eles os centros escolares, os residentes da zona e as empresas e profesionais vinculados ao transporte.
“Exiximos que escoiten a comunidade educativa, a veciñanza e o sector do transporte antes de que o inicio do curso sexa un caos”, concluíu.
