O candidato socialista á Alcaldía de Santiago, Pedro Blanco, anunciou que o Grupo Municipal Socialista solicitará formalmente a comparecencia da alcaldesa, Goretti Sanmartín, no Pleno municipal para abordar a actuación do Goberno compostelán en relación co proxecto Fly2Galicia.
A formación socialista considera que as explicacións ofrecidas ata o momento polo Executivo local non permiten aclarar o alcance da participación municipal na iniciativa. “Chegados a este punto, non abondan explicacións a medias. A alcaldesa ten que comparecer e explicar con absoluta transparencia que fixo o seu Goberno durante todos estes meses con Fly2Galicia”, afirmou Blanco.
O candidato do PSdeG sitúa unha das principais cuestións por esclarecer na evolución do discurso do Goberno municipal desde que se deu a coñecer a iniciativa. Segundo expuxo, nun primeiro momento desde o Concello trasladouse que existira un traballo prolongado para favorecer a posta en marcha do proxecto, mentres que posteriormente, tras coñecerse novas informacións arredor da operativa, a alcaldesa limitou a relación municipal a contactos de menor alcance.
“Primeiro dixéronnos que levaban meses axudando para que este proxecto saíse adiante”, sinalou Blanco, quen engadiu que, cando comezaron a difundirse informacións que xeraron interrogantes sobre a iniciativa, “a señora Sanmartín tratou de reducir todo a unhas simples reunións e de desvincularse da iniciativa”.
Por este motivo, o Grupo Municipal Socialista quere que a alcaldesa explique diante da Corporación que actuacións concretas realizou o Concello durante os meses previos, así como o grao de coñecemento que tiña o Executivo compostelán sobre as sociedades relacionadas coa proposta. Blanco reclama, en concreto, que Sanmartín aclare “que xestións se realizaron desde o Concello e que información se tiña sobre as empresas que estaban detrás da operativa”.
O socialista sostén que o seu grupo vén reclamando aclaracións desde que xurdiron as primeiras dúbidas sobre Fly2Galicia. “Pedimos explicacións desde o primeiro momento”, indicou, antes de criticar que, transcorridos varios días, “seguimos sen ter respostas claras”. Ao seu xuízo, as informacións que se foron coñecendo posteriormente fan necesario ofrecer unha explicación máis detallada sobre o papel desempeñado pola administración local.
Blanco quixo diferenciar estas críticas do apoio á procura de novas conexións aéreas para Santiago de Compostela. O candidato asegurou que os socialistas respaldarán as actuacións municipais destinadas a ampliar a conectividade da cidade, aínda que condicionou ese apoio á existencia de comprobacións previas sobre os proxectos cos que colabora a administración.
“Sempre apoiaremos que o Concello traballe para conseguir novas conexións”, afirmou. Con todo, engadiu que “se un Goberno leva meses traballando nun proxecto, ten a responsabilidade de saber con quen está traballando e comprobar a súa viabilidade antes de prestarlle respaldo institucional”.
