O Grupo Municipal Socialista de Santiago reclamou ao Goberno local que convoque de maneira inmediata as axudas municipais de 2026 destinadas ás asociacións veciñais, ao considerar que o atraso está a dificultar a planificación das actividades destas entidades nos barrios e parroquias do municipio.
A concelleira socialista Marta Abal advertiu de que, coa chegada do outono próxima, as asociacións seguen sen coñecer os recursos municipais cos que poderán contar durante este exercicio. Segundo explicou, o seu grupo xa alertara desta situación o pasado 1 de xullo e, case dous meses despois, a convocatoria continúa pendente.
“As axudas continúan sen convocar”, sinalou Abal, quen considera que a falta dunha resolución a estas alturas do ano deixa ás entidades veciñais sen información suficiente para organizar a súa programación.
Os socialistas reclaman por este motivo á alcaldesa, Goretti Sanmartín, que adopte medidas para desbloquear a convocatoria. Abal sostén que o atraso ten consecuencias directas sobre o funcionamento do movemento veciñal compostelán, xa que moitas asociacións dependen destas achegas para desenvolver parte da súa actividade anual.
O PSOE lembra que as asociacións veciñais desempeñan tarefas nos barrios e parroquias de Santiago, cunha programación que inclúe iniciativas culturais, sociais e de lecer. Nalgúns casos, segundo explicou a edil socialista, as subvencións municipais tamén contribúen a sufragar os gastos de funcionamento e mantemento dos locais das entidades.
“É inadmisible que as asociacións veciñais que precisan programar con antelación as súas actividades continúen a estas alturas do ano sen certezas sobre os recursos dos que van dispor”, afirmou Abal.
A concelleira cualificou como unha situación “sen precedentes” o atraso acumulado durante 2026 e insistiu en que a administración municipal debe ofrecer un calendario que permita ás entidades anticipar a organización das súas actividades e os gastos asociados.
Ademais de reclamar a publicación inmediata das axudas correspondentes a 2026, o grupo socialista solicita cambios para evitar que unha situación semellante se repita o próximo exercicio.
En concreto, propón que a convocatoria das subvencións de 2027 estea publicada, como máximo, no mes de xaneiro, de maneira que as asociacións coñezan desde o inicio do ano as condicións e os recursos aos que poden optar.
“As asociacións necesitan previsión, estabilidade e certezas e un Concello que lles facilite o seu traballo, non que llo dificulte”, concluíu Marta Abal.
