O líder do Partido Popular de Santiago, Borja Verea, comprometeuse a situar o período medio de pagamento aos provedores do Concello por baixo dos 20 días. O voceiro popular considera que o feito de que o actual Goberno municipal tarde unha media de 112 días en pagar as súas facturas evidencia “un problema de funcionamento e de xestión” con consecuencias directas para autónomos, pequenas e medianas empresas e profesionais que prestan servizos á Administración local. “Non estamos a falar simplemente dunha cifra ou dun indicador administrativo. Estamos a falar de persoas que fan un traballo, que teñen nóminas, impostos e gastos que pagar e que poden ter que agardar case catro meses para cobrar”, criticou Verea.
REORGANIZACIÓN INTERNA E MENOS BUROCRACIA
Para reducir os prazos, o líder do PP propón reorganizar o funcionamento interno do Concello, reducir a burocracia e mellorar a coordinación entre os distintos departamentos municipais. A súa proposta inclúe tamén simplificar os procedementos administrativos e establecer un seguimento constante das facturas pendentes. Verea defende que estas medidas permitirían axilizar os pagamentos e evitar que as demoras da Administración municipal recaian sobre a tesouraría de autónomos, empresas e profesionais.
