A voceira do Goberno local de Santiago, Míriam Louzao, informou de que as familias solicitantes do servizo de comedor e madrugadores teñen ata o 19 de agosto para cubrir o formulario de preinscrición. Tal e como trasladou en rolda de prensa este luns, notificóuselles a todas as familias que terán que cubrir este formulario na aplicación eHabilis, paso obrigatorio para completar a preinscrición para o servizo do curso 2026/2027.
Nel poderán indicar a información relativa aos días para os que desexan os servizos, a información alimentaria e sanitaria relevante, así como os datos bancarios. No caso de dúbidas durante o procedemento, o Concello habilitou o teléfono gratuíto 88181 91 07 en horario de 8.00 a 15.00 horas. Ademais, haberá atención presencial no Edificio Cersia en horario de 9.00 a 14.00 horas de luns a venres, desde este luns e ata o 19 de agosto. Este foi un dos aspectos tratados na rolda de prensa posterior á xunta do Goberno local, na que Míriam Louzao deu conta de diversas licenzas de obra e subvencións concedidas a entidades compostelás.
De maneira detallada, explicou que se aprobou un total de 488.658 euros en subvencións para realizar actividades culturais e en convenios con asociacións que desenvolven programas nos ámbitos da Cultura, Educación, Igualdade, Servizos Sociais e Migración. Entre eles, destaca un convenio coa USC para o programa “Verán CampUSC 2026”, de 9.000 euros; outro coa Asociación Solidariedade Galega para financiar o programa “Vacacións en Paz 2026”, de 8.000 euros; ou unha colaboración coa Asociación Galega para a Axuda dos Enfermos con Demencia tipo Alzheimer (Agadea), para desenvolver o programa “Activa Mente 2. Corpo Activo”, con 21.150,00 euros.
Tamén, na mesma sesión aprobouse a prórroga do contrato do “Servizo de Xerencia do Plan de Desenvolvemento Turismo Sustentable” por un prazo de catro meses, que abrangue desde o 1 de setembro ata o 31 de decembro de 2026, por un importe de 27.427 euros.
Esta prórroga considérase “necesaria” para garantir a continuidade técnica que permita culminar as actuacións previstas, evitar disfuncións na súa execución e asegurar a correcta aplicación e xustificación dos fondos recibidos da Secretaría de Estado de Turismo, da Axencia de Turismo de Galicia e do propio Concello de Santiago.
Así mesmo, aprobouse ampliar o prazo do contrato de “Servizo para a redacción de proxectos construtivos para a ampliación e rehabilitación das redes municipais do ciclo integral da auga nas parroquias de Sabugueira, A Peregrina e San Xoán de Fecha”, concretamente o correspondente ao Lote II: rehabilitación do colector xeral do saneamento na parroquia de Sabugueira, adxudicado á empresa Proyfe, SL, por dous meses e medio.
Esta decisión débese a que, durante a revisión e inspección das condicións da rede de saneamento, se detectou un treito na parroquia de Sabugueira que, por posibles problemas de infiltración, retrasou o traballo.
