O Concello de Santiago presentou unha nova edición do programa Compostela Convive, unha iniciativa orientada a promover a convivencia, o respecto á diversidade e o diálogo intercultural na cidade. A proposta foi dada a coñecer pola concelleira de Dereitos e Servizos Sociais, Promoción Económica e Xuventude, María Rozas, xunto co presidente do Foro Galego da Inmigración, Miguel Fernández.
O programa desenvólvese a través da Unidade de Atención ás Persoas Migrantes, a OAMI, e inclúe actividades nos meses de xuño, xullo e setembro. Segundo explicou Rozas, o obxectivo é contribuír a construír un Santiago máis inclusivo e facer visible a presenza das diferentes culturas que forman parte da vida diaria da cidade.
A concelleira lembrou que, segundo os datos do padrón municipal, en Compostela viven arredor de 10.000 persoas de orixe estranxeira. Rozas defendeu que esta realidade debe entenderse como “unha enorme riqueza” para a cidade e sinalou que o programa busca poñer o foco non só na achega económica da poboación migrante, senón tamén na súa contribución social e cultural.
A presentación tivo lugar nun contexto marcado polo proceso de regularización de persoas migrantes, que remata o vindeiro 30 de xuño. Rozas fixo referencia a esta cuestión para subliñar a situación de persoas que vivían no Estado sen documentación administrativa regularizada e, polo tanto, sen acceso pleno a dereitos. Nesa liña, apuntou que a regularización permitirá que moitas delas poidan contar cun contrato laboral e desenvolver a súa vida con máis garantías.
A programación de Compostela Convive comezará este xoves 18 de xuño na libraría Numax, cun encontro literario arredor das migracións contemporáneas, os dereitos humanos, as desigualdades globais e os vínculos entre África e Europa. A conversa contará con Xani Lalán e Jonatan Santos, tomando como punto de partida publicacións como ‘La luna está en Duala’ e ‘Latir de un continente’.
Miguel Fernández destacou o papel de Xani Lalán como divulgador e activista, e sinalou que é unha persoa que está a contribuír a transmitir unha imaxe diferente do continente africano no conxunto do Estado. Segundo indicou, a súa intervención permitirá abordar con claridade as causas das migracións e as realidades sociais que as rodean.
A segunda actividade prevista en Numax será o 26 de xuño, coa proxección da curtametraxe documental Los cayucos de Kayar, presentada por Timbo Ossan. A peza afonda nas rutas migratorias, nas razóns que levan moitas persoas a emprender estes desprazamentos e nas condicións sociais e económicas que impulsan estes movementos.
O programa inclúe tamén actividades complementarias na libraría Aenea, con conversas dirixidas especialmente a mulleres migrantes. Estes encontros estarán dinamizados por Angelí Ferreiro e Izel Fajardo, co obxectivo de abrir un espazo de intercambio de experiencias e de traballo compartido. Fernández explicou que esta liña de actuación forma parte dun labor continuado con mulleres migrantes que, segundo indicou, está a ofrecer resultados positivos.
No mes de xullo repetirase o bloque gastronómico que xa se puxo en marcha na edición anterior. As sesións celebraranse na Aula Gastronómica da Praza de Abastos os martes 7, 14 e 21 de xullo, e estarán dedicadas ás cociñas de Mali, Marrocos e Palestina, respectivamente.
A primeira xornada contará co cociñeiro de Mali Binafú Sila e coa participación de Kike Piñeiro, da Horta do Obradoiro, que xa colaborara na edición anterior. Fernández sinalou que Piñeiro actuará como acompañante neste proceso culinario. A programación continuará coa tradición gastronómica marroquí, vinculada a un restaurante incorporado recentemente á cidade, e coa cociña palestina. Neste último caso, Fernández explicou que a súa presenza busca tamén poñer en valor a cultura palestina no contexto actual, ao que se referiu como o “xenocidio que está sufrindo o pobo palestino”.
Ademais, en xullo o Concello colaborará coa comunidade peruana de Compostela, unha das máis organizadas da cidade segundo apuntou Fernández. A actividade terá lugar o 26 de xullo, coincidindo coa celebración da Festa Patria do Perú, e incluirá un percorrido con expresións culturais representativas. O presidente do Foro Galego da Inmigración lembrou que esta celebración xa se viña desenvolvendo na cidade e que desde o ano pasado quedou incorporada ao programa Compostela Convive.
O peche máis representativo da iniciativa quedará para setembro, coa celebración dun Festival Intercultural no que participarán diferentes comunidades migrantes presentes en Santiago. Fernández sinalou que este programa ten especial importancia nun momento no que, segundo dixo, existen discursos que buscan cuestionar a convivencia intercultural. Fronte a iso, defendeu a necesidade de reforzar espazos de encontro e participación.
Durante a rolda de prensa tamén se anunciou a conmemoración do Día Mundial das Persoas Refuxiadas, que terá lugar este sábado 20 de xuño na Casa das Máquinas. O acto incluirá unha actividade promovida a través do Fondo Galego de Cooperación e Solidariedade, coincidindo co 50 aniversario da proclamación da República Árabe Saharauí Democrática.
A proposta levará por título ‘Ao redor do té’ e consistirá nun coloquio sobre a situación das persoas refuxiadas nos campamentos saharauís. A actividade contará con testemuños en primeira persoa e estará acompañada pola cerimonia do té, como elemento simbólico e cultural vinculado ao pobo saharauí.
Fernández tamén destacou o papel do proceso de regularización no ámbito local. Segundo explicou, a Plataforma está participando activamente na atención ás persoas migrantes e na cidade e na súa contorna xa contabilizaron case 700 persoas atendidas. Na súa opinión, este proceso permitirá que moitas delas poidan incorporarse “como cidadanía de primeira”.
Rozas pechou a presentación animando á veciñanza a achegarse ás actividades do programa e a participar nas diferentes propostas abertas á cidadanía ao longo dos vindeiros meses.
