A alcaldesa de Santiago, Goretti Sanmartín, achacou a baixada dos ingresos por habitación dispoñible (RevPAR) nos primeiros meses do ano ao peche do aeroporto de Lavacolla entre abril e maio e á marcha de Ryanair da terminal compostelá. A preguntas dos medios en rolda de prensa, a rexedora da capital galega defendeu que xa tiñan en conta que estas dúas cuestións ían afectar ao número de visitantes na primeira parte do ano.
Así, defendeu o traballo do Concello e de Turismo de Santiago que, reivindicou, “continúa de maneira intensa” unha vez culminada a infraestrutura aeroportuaria. Pola contra, Goretti Sanmartín criticou á Xunta por non saber “cal vai ser a súa proposta de promoción”, así como por non haber “política de coordinación aeroportuaria”.
“Nós continuamos traballando, apoiando a diversificación de destino e de compañías. Iso creo que é algo que xa vai dar froito, impulsando rutas que son puntos neurálxicos. Temos 34 rutas, 17 delas internacionais, con tres continentes; non ten ningún sentido camiñar polo discurso que desvalorice o que fai Compostela”, remarcou.
Nesta liña, insistiu en que os datos de visitantes e de rendibilidade hoteleira “xa eran sabidos” e teñen “unha explicación concreta”, reiterando que o traballo realizado por Turismo de Santiago “está a verse”.
INSEGURIDADE
Doutra banda, preguntada sobre a decisión de comunidades de veciños do Ensanche de recorrer á vía xudicial para tratar de pechar locais e pisos que xeran algún tipo de problema, a alcaldesa dixo descoñecelo, pero asegurou que o Goberno local falará con quen o solicite.
Neste contexto, en relación co peche de establecementos nesta zona, Sanmartín defendeu que xa se procede a esta medida “naqueles que non cumpran”, tramitando “os expedientes oportunos”, pero, se cumpren os requisitos, lembrou que “non é unha cuestión potestativa”, senón que “está regulada”. “Unha administración non pode actuar de maneira arbitraria sobre abrir ou pechar locais. Si podo dicir que estamos atentas a que os locais cumpran con todo o que desde o punto de vista normativo teñen que cumprir”, sinalou.
Tamén apuntou que algunhas das problemáticas detectadas teñen que ver con altercados fóra dos establecementos, onde, subliñou, o Concello “xa tomou medidas”, con “contactos diarios” coa Delegación do Goberno para “colaborar e coordinar”. “Os reforzos anunciados creo que servirán para minguar esa sensación e percepción de inseguridade”, aseverou.
