A Xunta de Goberno Local de Santiago aprobou este luns, 8 de xuño, diferentes asuntos en materia de obras, contratación municipal, igualdade, instalacións deportivas e servizos públicos. A portavoz do goberno, Míriam Louzao, informou dos acordos adoptados, entre os que figuran a adxudicación de actuacións no rural, a prórroga de contratos de mantemento, a convocatoria de axudas para programas de igualdade e a tramitación da nova licitación para a xestión das escolas infantís municipais.
No apartado de urbanismo, o goberno local deu luz verde a dúas licenzas de obra maior. A primeira corresponde á demolición dunha edificación situada na rúa do Penedo, número 44, mentres que a segunda permite a construción dunha vivenda unifamiliar na rúa da Cañeira, número 10B.
En materia de contratación, a Xunta de Goberno aprobou a adxudicación a Cosmalca SL das obras de pavimentación nos lugares de Bar de Arriba e Bar de Abaixo, así como na rúa dos Asidros. A intervención conta con financiamento da Deputación da Coruña a través do Plan Provincial de Cooperación ás Obras e Servizos de Competencia Municipal de 2023. O contrato ascende a 258.902,49 euros, IVE incluído, e terá un prazo de execución de tres meses.
Segundo explicou Louzao, os traballos desenvolveranse en cinco vías, cunha lonxitude total superior ao quilómetro. A actuación inclúe a renovación da pavimentación, a mellora da drenaxe de augas, a ampliación da rede de abastecemento e a instalación dun prisma con tubaxes para permitir o paso de futuros servizos.
Tamén no ámbito rural, o executivo municipal aprobou o expediente para sacar a licitación a ampliación das redes de abastecemento e saneamento na rúa Nova da Igrexa, na parroquia da Araño. Neste caso, o orzamento base é de 65.549,09 euros e a actuación está incluída no POS+ 2025, cun prazo previsto de execución de catro meses.
A Xunta de Goberno autorizou ademais a prórroga por dous anos do contrato de conservación, reparación e pequena reforma de diversos edificios e instalacións dependentes do Concello, adxudicado a Espina y Delfín SL. A prórroga terá efectos desde o 1 de agosto de 2026 ata o 31 de xullo de 2028, cun importe total de 1.420.172,60 euros, o que supón un gasto anual de 710.086,30 euros.
A maior parte dese contrato destinarase ao mantemento dos centros de educación infantil e primaria, cunha previsión anual de 400.000 euros. O resto do orzamento anual repártese entre instalacións deportivas, con 100.000 euros; centros socioculturais, con 96.000 euros; e outras dependencias municipais, con 114.000 euros.
Outro dos acordos aprobados foi a prórroga do contrato de arrendamento dun local na Corredoira das Fraguas, destinado a usos socioculturais e asociativos no barrio de San Pedro. O importe anual deste alugueiro é de 9.999,48 euros.
A Xunta de Goberno tamén aprobou a convocatoria de subvencións para actividades e programas en prol da igualdade efectiva entre mulleres e homes, das persoas do colectivo LGBTIQ+ e da prevención e loita contra as violencias machistas para o ano 2026. A liña de axudas conta cunha dotación global de 30.000 euros e cada entidade poderá recibir un máximo de 2.800 euros.
Poderán concorrer a esta convocatoria as entidades sen ánimo de lucro inscritas no Rexistro Municipal de Asociacións. O prazo para presentar solicitudes será de 15 días naturais desde a publicación da convocatoria no Boletín Oficial da Provincia. As bases estarán dispoñibles no taboleiro de anuncios electrónico, na web xeral do Concello e tamén na páxina do Centro de Información á Muller. As actividades subvencionables deberán desenvolverse entre o 1 de xaneiro e o 30 de setembro deste ano.
Por vía de urxencia, o goberno local incluíu tamén a aprobación das bases reguladoras da cesión de uso das instalacións municipais para actividades deportivas e físicas durante a tempada 2026-2027. O prazo xeral para solicitar espazos destinados a adestramentos e actividades físicas será de 15 días desde a publicación da convocatoria na web municipal. No caso das actividades vinculadas a centros educativos, o prazo permanecerá aberto ata o 20 de setembro, ao contaren cunha franxa horaria específica.
Para deportistas individuais que soliciten o uso das pistas de atletismo do Estadio Verónica Boquete, o prazo estará aberto durante toda a tempada. As bases establecen tres niveis de prioridade: en primeiro lugar, as actividades de centros educativos e de entidades que traballen con persoas con discapacidade; en segundo lugar, as de ámbito federativo; e, en terceiro lugar, as actividades físicas e propostas deportivas, recreativas ou competitivas non oficiais. Segundo o goberno local, estes criterios buscan favorecer unha ocupación completa da rede de instalacións deportivas e un uso equitativo por parte das entidades solicitantes.
Louzao informou tamén dos asuntos aprobados nunha Xunta de Goberno extraordinaria celebrada o xoves da semana pasada. Nesa sesión aprobouse o contrato de patrocinio da duodécima edición da ‘Maker Faire Galicia’, cun orzamento de 50.092,79 euros.
Na mesma reunión extraordinaria tamén se aprobou o expediente para contratar o servizo de xestión das escolas infantís municipais de Conxo, Fontiñas e Meixonfrío-Salgueiriños, que conforman a rede municipal. O orzamento base de licitación é de 3.130.973,70 euros para dous anos, algo máis de 1,5 millóns de euros anuais. Esta contía supón un incremento do 24,8% con respecto ao contrato anterior, adxudicado en 2022. O prazo para presentar ofertas estará aberto ata o 9 de xullo.
A portavoz do goberno explicou que o incremento orzamentario responde á necesidade de incorporar as novas condicións salariais recollidas no convenio do sector aprobado o ano pasado, así como ao aumento dos custos das materias primas do comedor e dos materiais didácticos.
O novo prego introduce tamén cambios no modelo de xestión. Segundo indicou Louzao, o Concello pasa dun sistema baseado nun pagamento mensual fixo a outro de prezos unitarios por hora efectiva real. O documento establece un teito total anual de 60.574,54 horas de servizo. A portavoz sinalou que este mecanismo permitirá que os aforros que se poidan producir sexan recuperados e destinados a melloras educativas.
Entre os criterios de adxudicación, o prego outorga máis peso á calidade do servizo, con puntuación para medidas como o reforzo de educadoras en horas críticas ordinarias, as titorías individuais previas ao período de adaptación ou un novo proxecto lúdico estival específico para nenos e nenas de 0 a 3 anos durante a garda de agosto.
O contrato incorpora ademais modificacións no servizo de comedor e cociña, que, segundo Louzao, pasará a concibirse como un programa vinculado á seguridade sanitaria e á pedagoxía nutricional. O prego separa as funcións do persoal de cociña e limpeza, eliminando a categoría mixta anterior, na que unha mesma persoa asumía ambas tarefas. Para iso, prevese un incremento de horas que permita contar con persoal diferenciado para cada función.
O documento tamén introduce novas obrigas de control económico para a empresa adxudicataria, que deberá presentar antes do 30 de setembro unha memoria de custos directos referida ao curso escolar anterior. Ademais, o apartado de atención á diversidade acada unha valoración de 20 puntos, con cinco puntos para ferramentas de detección precoz e quince para unha bolsa de ata 450 horas anuais de especialistas de atención temperá para estimulación directa na aula.
Louzao defendeu que o novo modelo supón un cambio na forma de prestar o servizo. Nas súas palabras, o Concello deixa de financiar “unha estrutura teórica” para pasar a mercar “resultados medibles de calidade asistencial, pedagóxica e sanitaria”.
Na Xunta de Goberno extraordinaria do xoves tamén se adxudicaron os tres lotes do contrato de servizos para a organización da 16ª edición dos Xogos do Eixo Atlántico. O lote correspondente á organización, infraestrutura e loxística foi adxudicado a Sport Madness Eventos SL por 143.854,48 euros. O servizo de transporte interno recaeu en Autocares Rías Baixas SL, por 39.061 euros, mentres que a atención sanitaria foi adxudicada a Ambulancias de Ortigueira, cunha oferta de 48.110 euros.
O gasto total comprometido para estes tres servizos ascende a 231.025,48 euros, que serán financiados a través do imposto de estadías turísticas. Segundo trasladou o goberno local, esta edición dos Xogos do Eixo Atlántico mobilizará arredor de 2.400 deportistas e podería atraer a Compostela máis de 5.000 persoas durante a primeira quincena de xullo.
