O conselleiro de Educación da Xunta de Galicia, Román Rodríguez, instou este luns ao Concello de Santiago a buscar unha solución ao conflito laboral que mantén en folga ao persoal de limpeza e conserxería dos centros educativos públicos da cidade. O responsable autonómico incidiu na necesidade de restablecer canto antes a normalidade nos colexios, especialmente nos de Educación Infantil e Primaria.
Preguntado pola situación derivada da protesta, Rodríguez afirmou que o máis importante é garantir que o alumnado poida desenvolver a súa actividade en condicións axeitadas. “É importante que o alumnado poida, sobre todo de infantil e primaria, estar nun ambiente saudable e poida ter todos os servizos que, neste caso, son competencia exclusiva do Concello”, sinalou. Nese sentido, expresou o seu desexo de que a situación se resolva “o antes posible”.
O conselleiro lembrou que se trata dun servizo municipal xestionado a través dunha empresa concesionaria e considerou que corresponde ao Concello actuar para desbloquear o conflito. Segundo indicou, a administración local é a responsable da fórmula escollida para a prestación do servizo e, por tanto, tamén da súa supervisión.
Nas súas declaracións, Rodríguez criticou os argumentos do Goberno municipal sobre a responsabilidade da empresa adxudicataria. “O Concello é quen decide como presta o servizo”, afirmou, ao tempo que lembrou que a administración local ten externalizada esta prestación.
O titular de Educación sostivo que, nun contexto de concesión administrativa, a resolución dos problemas debe pasar pola negociación entre o Concello, a empresa e os traballadores. “O Concello ten que negociar coa empresa e a empresa cos traballadores”, manifestou.
Ademais, Rodríguez aproveitou para cuestionar a posición do Bloque Nacionalista Galego respecto das concesións de servizos públicos. Segundo apuntou, cando se producen incidencias en servizos dependentes doutras administracións, o BNG adoita responsabilizar directamente ao goberno correspondente. Por iso, cualificou de “excusa de moi mal pagador” atribuír o conflito unicamente á empresa concesionaria.
