O Grupo Municipal Socialista de Santiago presentará no próximo pleno do Concello unha moción coa que pretende instar á Xunta de Galicia a executar unha revisión integral do proxecto da senda ciclista ao seu paso por Conxo, ademais de reclamar a paralización inmediata das obras nun tramo concreto da actuación.
O portavoz socialista Sindo Guinarte cuestionou a intervención que se está a desenvolver nesta zona ao considerar que está a provocar afeccións nun ámbito de especial relevancia patrimonial e ambiental. Segundo explicou, a iniciativa que defenderán na sesión plenaria reclama a suspensión dos traballos entre o túnel da Ferbenza e Suarribas, así como a procura dun trazado alternativo.
Os socialistas sosteñen que este proxecto, financiado con fondos europeos Next Generation, está a executarse nun espazo que conta con diferentes elementos de protección e que forma parte do ámbito vinculado á declaración de Santiago como Patrimonio Mundial da Unesco. Tamén consideran que a actuación entra en conflito con outros proxectos previstos na contorna, entre eles o Ecobosque do Sar, igualmente financiado con fondos europeos.
Na súa intervención, Guinarte lembrou que existe un informe do ICOMOS, organismo asesor da Unesco en materia patrimonial, no que se advertía sobre posibles impactos na zona. O edil socialista sinalou ademais que o proxecto xerou oposición entre parte da veciñanza e colectivos sociais, aínda que asegurou que a administración autonómica mantivo a execución prevista.
Segundo expuxo, o estado actual da actuación deixa xa consecuencias visibles sobre a contorna. Guinarte afirmou que a situación existente “é a fotografía da agresión aos valores patrimoniais de Conxo a día de hoxe”, ao referirse á presenza de árbores cortadas, muros derrubados e afeccións na ribeira do Sar.
