O BNG confirmou oficialmente a candidatura de Goretti Sanmartín ás eleccións municipais de 2027 despois de que a asemblea local da formación aprobase por unanimidade a súa designación. O acto, no que participou a portavoz nacional do partido, Ana Pontón, serviu tamén para facer balance dos case tres anos de mandato do actual goberno municipal e para avanzar as liñas políticas que a formación nacionalista pretende consolidar de cara ao seguinte período.
Durante a presentación, Ana Pontón defendeu a continuidade do proxecto liderado por Sanmartín e asegurou que a alcaldesa conta cun perfil capaz de manter a dirección política do Concello nos próximos anos. A líder nacionalista afirmou que Santiago necesita “un proxecto con estabilidade e ambición” e sostivo que a actual rexedora “vai recibir o apoio maioritario dos veciños e veciñas” para continuar á fronte do goberno local.
Pontón empregou boa parte da súa intervención para facer unha valoración do traballo desenvolvido polo executivo municipal nestes anos, destacando cuestións relacionadas coa vivenda, a planificación urbana ou a regulación turística. Tamén criticou o papel da oposición municipal, á que cualificou como “corrosiva” e acusou de actuar “por interese partidista”.
A portavoz nacional do BNG considerou que o goberno local foi quen de impulsar medidas en ámbitos nos que os concellos dispoñen de competencias limitadas, como a regulación do mercado residencial. Entre os aspectos sinalados citou a declaración de Santiago como zona de mercado residencial tensionado, as limitacións ás vivendas de uso turístico e actuacións urbanísticas destinadas á recuperación de espazos públicos.
Pola súa parte, Goretti Sanmartín aceptou formalmente a candidatura reivindicando o traballo realizado polo executivo municipal e asegurando que afronta esta nova etapa “con todas as ganas, con toda a vontade e con toda a ilusión”.
A alcaldesa sostivo que as políticas impulsadas polo seu goberno responden a unha estratexia de transformación a medio e longo prazo. “Dende o BNG sempre apostamos polas políticas transformadoras, non pola política cosmética de urxencias”, afirmou.
Ao longo da súa intervención, Sanmartín realizou un percorrido por distintas iniciativas desenvolvidas durante o mandato. Entre elas citou o imposto sobre estadías turísticas, o novo modelo de comedores escolares, o futuro contrato de transporte urbano, as medidas relacionadas coa vivenda ou actuacións urbanísticas como o desbloqueo da parcela de Peleteiro.
A candidata tamén reivindicou a necesidade de executar proxectos cunha planificación prolongada no tempo. “Estamos no bo camiño”, afirmou, antes de defender que algunhas transformacións estruturais precisan desenvolverse “sen présas” e con procesos máis amplos de deseño e execución.
No ámbito urbano, destacou propostas ligadas á reordenación da cidade, con actuacións previstas no Ensanche, a Praza de Vigo, o corredor central ou os proxectos vinculados ao denominado ‘Horizonte Compostela’, que inclúe actuacións na zona norte da cidade.
Sanmartín tamén avanzou algúns dos retos que o BNG sitúa para o seguinte mandato, entre os que mencionou a sustentabilidade, a mobilidade, a mellora dos servizos públicos, o reforzo do comercio local e a redución das desigualdades territoriais entre o ámbito urbano e rural.
A alcaldesa pechou a súa intervención sinalando que a súa candidatura chega avalada “polo traballo feito” e pola vontade de continuar desenvolvendo proxectos para a cidade. “Temos retos que cumprir por diante para mellorar Santiago de Compostela no futuro”, concluíu.
