O concelleiro non adscrito Gonzalo Muíños fixo balance este sábado do primeiro ano transcorrido desde a saída das concelleiras e concelleiro non adscritos do Grupo Municipal Socialista, unha decisión que cualificou como consecuencia dun proceso “arbitrario” promovido, segundo afirmou, polo propio partido por motivos internos de poder e represalias políticas.
Coincidindo co aniversario do pleno do 26 de maio de 2024 no que Mercedes Rosón, Mila Castro, Marta Álvarez e o propio Muíños pasaron a integrarse como representantes non adscritos na Corporación compostelá, o edil sostivo que aquela decisión respondeu a un “axuste de contas” e a “ansias de poder”, acusando ao PSOE local de “xogar con temas tan serios como a regulación das vivendas de uso turístico”.
Muíños estableceu ademais paralelismos coa actualidade política noutras cidades galegas, en referencia ao caso de Lugo, para cuestionar o posicionamento socialista fronte a determinadas prácticas políticas. Segundo indicou, “as mesmas persoas que denuncian prácticas de compra-venda de vontades” serían, ao seu xuízo, as que en Santiago intentaron “comprar” a vontade do grupo mediante ofrecementos de cargos co obxectivo de facilitar a entrada de Héctor Bouza na corporación.
Nas súas declaracións, o concelleiro asegurou que durante este ano mantiveron a súa identidade política socialista, aínda que desvinculada da estrutura orgánica do partido. “Somos máis de Santiago que de partido”, afirmou, defendendo que o seu labor se centrou na defensa dun proxecto ligado á “clase traballadora” e á realidade compostelá por riba das dinámicas internas partidarias.
O edil reivindicou o papel das non adscritas como actor político clave en decisións relevantes para o mandato, destacando a súa participación no desbloqueo de cuestións como a Operación Peleteiro, o debate sobre un novo modelo de comedores escolares ou a tramitación dos orzamentos municipais. Neste sentido, sinalou que, mesmo mantendo discrepancias co goberno local, optaron por facilitar determinados procesos “por responsabilidade” coa cidadanía.
Tamén lembrou o seu apoio a iniciativas como a nova licitación do contrato da auga e subliñou que a súa posición política se caracterizou por buscar consensos sen renunciar á súa identidade ideolóxica. “Hai espazos para o consenso de todas as forzas políticas, pero sen renunciar ao que cada unha representa”, sostivo.
Muíños aproveitou igualmente para remarcar a negativa do grupo a apoiar unha eventual moción de censura, unha posibilidade que asegurou rexeitaron con claridade. Ao mesmo tempo, deslizou críticas cara ao PSOE por non actuar, segundo a súa versión, coa mesma contundencia durante a cuestión de confianza á que se someteu a alcaldesa Goretti Sanmartín.
