O Grupo Municipal Socialista de Santiago advertiu este martes da situación da vivenda na capital galega tras coñecerse os últimos datos sobre construción residencial, que apuntan, segundo a formación, a unha caída significativa da oferta de nova edificación fronte ao aumento da demanda. A concelleira socialista Marta Abal cualificou de “moi preocupantes” as cifras difundidas polo Colexio Oficial da Arquitectura Técnica da Coruña, que recollen que no primeiro trimestre de 2026 se visaron só 18 vivendas novas en Santiago, fronte ás 101 rexistradas no mesmo período de 2019.
Abal sostivo que estes datos “evidencian un problema estrutural de oferta de vivenda” nun contexto no que, segundo indicou, continúa a medrar a necesidade de acceso residencial. Nese sentido, lembrou que en maio de 2026 había 1.813 persoas inscritas no Rexistro Único de Demandantes de Vivenda en Santiago, unha cifra que, ao seu xuízo, mostra o desequilibrio entre demanda e dispoñibilidade real.
Dende o PSOE local sinalan que unha das causas desta situación reside en que parte do solo residencial previsto no planeamento urbanístico continúa sen desenvolverse. Abal apuntou a ámbitos como Cancela da Sionlla, O Miño Norte, A Pulleira ou Agra dos Campos como espazos pendentes de execución e defendeu a necesidade dunha “planificación estratéxica da vivenda a medio prazo” orientada a desbloquear estes solos, mobilizar vivenda baleira e incrementar a oferta efectiva.
A edil tamén puxo o foco na necesidade de modernizar e acelerar os procedementos municipais vinculados á concesión de licenzas, apostando por unha maior utilización da administración electrónica para reducir tempos e facer máis áxil a tramitación administrativa.
CONDENA POLA AGRESIÓN HOMÓFOBA EN SANTIAGO
Noutra orde de asuntos, o secretario xeral do PSOE compostelán, Aitor Bouza, trasladou a condena da formación ante a agresión homófoba coñecida nas últimas horas en Santiago. Bouza expresou o “apoio, cariño e afecto” do Partido Socialista á vítima e asegurou que “non hai espazo nin para o odio nin para a violencia” en Santiago nin en Galicia.
O responsable socialista vinculou este tipo de episodios á difusión de discursos de odio e insistiu na necesidade de reforzar a educación en igualdade para evitar novas agresións, ao tempo que avanzou que o partido continuará levando este tipo de cuestións ao Parlamento galego.
