A concelleira do Partido Popular de Santiago, Nerea Barcia, denunciou este mércores o que considera unha falta de planificación por parte do Goberno municipal de BNG e Compostela Aberta na organización dos traballos de roza en espazos públicos, unha cuestión que vinculou coa prevención de incendios no rural e nas áreas próximas a estradas e vías.
A edil popular asegurou que, chegados a estas datas, “segue existindo unha incerteza total” sobre o desenvolvemento deste servizo, ao sinalar que non hai un calendario público definido nin información concreta sobre o inicio das tarefas de limpeza e mantemento.
Barcia reclamou ao executivo local explicacións sobre como se organizarán estes traballos e tamén sobre se existe un contrato en vigor para executalos. Segundo apuntou, no ano 2025 as rozas comezaran a principios de maio, mentres que neste exercicio, segundo denuncia o PP, aínda non se iniciou o servizo nin se comunicaron prazos.
A representante popular tamén criticou o que cualificou de contradición entre as esixencias trasladadas polo Concello á veciñanza para manter limpas as súas parcelas antes do 31 de maio, baixo ameaza de sancións, e a ausencia, segundo a súa versión, da mesma dilixencia nos espazos de titularidade pública.
