As concelleiras Non Adscritas de Santiago de Compostela volveron celebrar este Primeiro de Maio a súa tradicional ofrenda floral ante o busto de Pablo Iglesias situado na avenida de Castelao, no barrio de Vite, nun acto simbólico que repiten por segundo ano consecutivo tras a súa saída do PSOE e co que reivindicaron a súa continuidade política desde a “coherencia, lealdade e compromiso” coa cidade e cos principios que, segundo defenderon, seguen guiando a súa acción pública.
Durante o acto, Mercedes Rosón situou esta convocatoria nun contexto político marcado pola actualidade socialista, facendo referencia aos “tempos convulsos” e asegurando que, neste escenario, resulta especialmente relevante “ser conscientes de quen somos e do que representamos”. A concelleira insistiu en que a posición das Non Adscritascontinuará baseada na “coherencia”, unha liña que, segundo sinalou, mantiveron ata o de agora e que seguirán defendendo.
Rosón presentou a figura de Pablo Iglesias como referente para o exercicio da política municipal, vinculando o seu legado á idea de servizo público e á necesidade de manter unha conexión directa cos problemas cotiáns da veciñanza compostelá. Nese sentido, reivindicou o traballo desenvolvido polas edís no último pleno municipal, no que as catro iniciativas presentadas por este grupo saíron adiante co respaldo maioritario da Corporación.
Entre os asuntos trasladados ao debate plenario, as Non Adscritas puxeron o foco en cuestións relacionadas coa Atención Primaria, como a sobrecarga asistencial no Punto de Atención Continuada de Santiago durante as mañás dos sábados tras a reorganización do SERGAS e o peche de centros de saúde; tamén en infraestruturas paralizadas no rural, como a senda de Figueiras ou a ampliación da estrada entre Santiago e Val do Dubra na contorna da Peregrina.
A estas cuestións sumáronse denuncias sobre o estado do antigo vertedoiro de Aríns, polo seu abandono e falta de mantemento, así como demandas de mellora da accesibilidade na Praza de Ultreia. Para Rosón, todas estas cuestións responden a “problemas reais” da cidadanía e encaixan, segundo trasladou, cunha visión política ligada ao benestar, á solidariedade e á xustiza social.
Coincidindo coa celebración do Día Internacional da Clase Traballadora, as concelleiras quixeron ademais expresar o seu respaldo ás mobilizacións sociais vinculadas á defensa dos dereitos laborais. Rosón subliñou a necesidade de continuar avanzando na mellora das condicións de traballo e fixo un chamamento á participación activa da cidadanía na defensa dos dereitos conquistados e na reclamación de novos avances sociais.
