O Partido Socialista de Santiago manifestou o seu respaldo ás veciñas e veciños de Mallou ante o proceso de expropiacións previsto para o desenvolvemento dun novo polígono de vivendas na zona, cuestionando con dureza as valoracións económicas trasladadas aos propietarios afectados.
O secretario xeral dos socialistas composteláns, Aitor Bouza, cualificou de “prezo de miseria” as cantidades formuladas para estas expropiacións e asegurou que, aínda recoñecendo a necesidade de impulsar novas promocións residenciais en Santiago, estas actuacións non poden executarse “a costa da veciñanza de Mallou”.
Bouza sostén que a política de vivenda impulsada polo Goberno galego non debe cargar sobre un barrio concreto o custo dunha planificación que considera deficiente. Neste sentido, acusou ao Executivo presidido por Alfonso Rueda de non desenvolver políticas públicas eficaces en materia de acceso á vivenda e de pretender que sexan os propietarios afectados quen asuman as consecuencias desa xestión.
O líder socialista local tamén vinculou esta situación coa actuación do Partido Popular en Santiago, sinalando directamente ao seu portavoz local, Borja Verea, por avalar as decisións da Xunta neste ámbito.
Dende o PSOE compostelán comprométense a manter contacto directo coa veciñanza de Mallou, recollendo as súas demandas e exercendo, segundo indican, unha labor de vixilancia política sobre o proceso para garantir que os dereitos das persoas afectadas sexan respectados.
Ademais, Bouza anunciou que o grupo socialista trasladará esta cuestión ao Parlamento de Galicia, co obxectivo de reclamar explicacións á Xunta e demandar unha resposta inmediata sobre os criterios aplicados nas expropiacións, ao considerar que os residentes de Mallou non poden quedar “desatendidos e desamparados” ante unha actuación urbanística desta dimensión.
