O concelleiro do Partido Popular de Santiago, Adrián Villa, denunciou este venres unha “preocupante proliferación de vertedoiros” de residuos en diversos puntos do municipio durante os últimos anos. Nunha nota de prensa, o edil cualificou a situación como unha mostra de “pasotismo” por parte do goberno de coalición do BNG e Compostela Aberta, aos que acusou de exercer un “falso medioambientalismo” que esquecen ao chegar ao poder.
Vila puxo como exemplo un vertedoiro incontrolado na parroquia de Laraño, situado nunha pista abandonada onde se acumula un “gran volume de cascallos de obra” e outros refugallos. Segundo o concelleiro, non é difícil atopar puntos similares noutras zonas, incluído o propio Ensanche, onde criticou a acumulación de lixo arredor dos colectores por unha suposta falta de información e preocupación por parte do Executivo local.
Para os populares, parte do problema reside nas limitacións do punto limpo do polígono do Tambre. Vila explicou que as actuais restricións de volume impiden que particulares que realizan pequenas obras domésticas poidan entregar todo o cascallo de xeito gratuíto. Esta situación obriga a contratar empresas privadas con custo económico, o que, segundo o edil, empuxa a moitas persoas a recorrer a vertedoiros ilegais para desfacerse dos materiais.
Ante este escenario, o Grupo Popular solicitou ao goberno municipal que realice un diagnóstico urxente destes puntos negros e proceda á retirada inmediata dos residuos. Así mesmo, instan a instalar sinalización de advertencia sobre as posibles sancións e a estudar unha flexibilización nos límites de depósito do punto limpo do Tambre para facilitar a xestión correcta dos cascallos por parte da cidadanía.
