A concelleira non adscrita Mercedes Rosón levará ao vindeiro pleno municipal unha proposición para reclamar a activación inmediata da Comisión Organizadora do Xacobeo 2027 e impulsar a creación dunha Comisión Especial municipal que permita planificar o Ano Santo desde o ámbito local. Segundo sinala, o obxectivo é que sexa Santiago quen lidere a xestión dun acontecemento que cualifica como propio da cidade.
Rosón considera que o Ano Santo representa un evento de especial relevancia cultural, patrimonial e turística para Compostela, ao tempo que implica desafíos organizativos. Neste contexto, apunta que a recente posta en marcha do Consejo Jacobeo debe ir acompañada da reactivación da Comisión Organizadora do Xacobeo 2027, un órgano interadministrativo no que participan a Xunta de Galicia, a Igrexa, o Goberno do Estado e o Concello de Santiago.
A edil sostén que o Xacobeo é “un evento da cidade que non pode xestionarse á marxe das prioridades da súa veciñanza” e advirte de que, na súa opinión, “Santiago non pode quedar reducido a un mero receptor de peregrinos nin ser marxinado das decisións estratéxicas”. Para as concelleiras non adscritas, a capital galega debe exercer un papel activo na proxección exterior do Ano Santo, en colaboración co resto das administracións implicadas.
INVESTIMENTOS ESTRUTURAIS E SERVIZOS PÚBLICOS
A proposta incide tamén na necesidade de priorizar investimentos vinculados ao Xacobeo que teñan continuidade máis alá do propio evento. Rosón subliña que a calidade dun destino turístico depende non só da programación cultural ou das campañas de promoción, senón tamén do funcionamento de servizos públicos como a limpeza, a seguridade, o transporte ou os aparcadoiros.
“Máis aló da programación de ocio, o Xacobeo conta xa cun enorme poder tractor pola propia forza da marca e a singularidade do evento”, afirma, polo que defende que o foco debe situarse na calidade do destino e na sostentabilidade, en coherencia coa filosofía que inspirou a implantación da taxa turística en Compostela.
UN ÓRGANO DE COORDINACIÓN DENDE O ÁMBITO LOCAL
A iniciativa que se debaterá no pleno do vindeiro xoves inclúe a creación dunha Comisión Especial municipal para o Xacobeo 2027, integrada por representantes do sector turístico, hostaleiro e comercial, así como por colectivos culturais e de ocio, asociacións veciñais e membros da Corporación.
Este órgano tería como finalidade “garantir a coordinación efectiva entre todos os axentes implicados, anticipar necesidades e definir estratexias de comunicación e promoción”. Ademais, segundo expón a concelleira, buscaría fomentar a sostentabilidade, preservar o patrimonio histórico e ambiental e procurar que os beneficios derivados do Ano Santo revertan de maneira equilibrada na comunidade local.
Rosón sinala tamén que esta ferramenta permitiría facilitar o acceso do tecido local á información sobre financiamento, subvencións, patrocinios e deducións fiscais, co propósito de promover a participación do sector privado e asociativo e asegurar unha xestión transparente dos recursos dispoñibles.
