A formación UCIN Santiago deu a coñecer este mércores, nun almorzo informativo celebrado en Santiago coa presenza do coordinador galego José Luis Calo e do candidato compostelán, Diego Adrián Mallo, un plan integral co que pretende introducir cambios estruturais na organización e funcionamento do Concello. A proposta, segundo expuxeron, aposta por un enfoque municipalista centrado na eficiencia administrativa, a seguridade cidadá, o acceso á vivenda, o apoio ao comercio de proximidade e o reforzo da participación veciñal.
Dende a organización sinalaron que “Santiago non pode seguir igual que hai vinte anos” e defenderon a necesidade de aplicar medidas “realistas, executables e pensadas para aplicarse desde o primeiro día da próxima lexislatura”.
No ámbito organizativo, UCIN propón realizar unha auditoría externa de todos os contratos municipais co obxectivo de avaliar a súa eficiencia e garantir maior transparencia na xestión. Ademais, contempla a creación dun departamento municipal de Intelixencia Artificial para axilizar trámites e reducir tempos de espera na administración local.
En materia de mobilidade, a formación aposta pola retirada dos radares que, segundo indican, teñen un fin recadatorio, así como pola eliminación do servizo ORA. Entre as súas propostas inclúese tamén a habilitación de novos aparcadoiros disuasorios e a municipalización dos parkings da Praza de Vigo e da Praza de Galicia.
O plan incorpora a creación de cuadrillas de mantemento urbano destinadas a actuar de maneira inmediata en incidencias como baches ou deterioro de beirarrúas, así como a constitución dun Corpo de Axentes Cívicos orientado a reforzar a convivencia.
No apartado de seguridade, UCIN defende o incremento de efectivos da Policía Local e do Servizo de Bombeiros e a solicitude de unidades antidisturbios, argumentando que “é o que corresponde a unha capital como Santiago de Compostela”.
MEDIDAS PARA O COMERCIO E O TURISMO
No eido económico, a proposta inclúe a posta en marcha dunha tarxeta municipal de apoio ao comercio local, que premie o consumo nos establecementos de proximidade. Tamén se recolle a creación dun bono turístico que integre acceso a museos, rutas culturais e transporte urbano.
Segundo explicaron, o obxectivo é fomentar un modelo de turismo sustentable que teña impacto directo na economía da cidade e no conxunto da veciñanza, así como desenvolver novas rutas culturais e de lecer que poñan en valor o patrimonio histórico e artístico compostelán.
EMPRESA MUNICIPAL DE VIVENDA
En relación coa política residencial, UCIN aposta por consolidar unha zona histórica “pensada para vivir”, con incentivos ao alugueiro estable e á rehabilitación de inmobles. O plan contempla a creación dunha empresa municipal de vivenda e a construción de vivenda pública, co foco posto na mocidade e nas familias.
INFRAESTRUTURAS DEPORTIVAS E MELLORAS NOS BARRIOS
Entre as actuacións previstas no ámbito deportivo figura o desenvolvemento do proxecto da piscina olímpica de Santa Marta, así como intervencións nos campos de fútbol municipais para mellorar as condicións de seguridade. O programa inclúe tamén a cuberta de parques infantís e a creación dun parque de xogos de auga en Belvís.
A formación recolle ademais actuacións estruturais en barrios que, segundo indican, levan anos “sen o mantemento necesario”.
SERVIZOS PÚBLICOS E PARTICIPACIÓN VECIÑAL
No que atinxe aos servizos públicos, UCIN defende a xestión directa de determinados ámbitos, como os centros socioculturais e o servizo de axuda no fogar. Tamén propón a modernización dos parques caninos e a revisión do modelo do refuxio de Bando.
O documento inclúe igualmente a rehabilitación progresiva dos colexios con maior deterioro e a elaboración dun plan integral de mellora dos barrios, consensuado coa veciñanza.
A formación concluíu que o seu proxecto pretende construír “a Compostela que queremos: moderna, segura, inclusiva, con vivenda accesible, comercio local forte e un turismo sostible que beneficie a toda a cidadanía”.
