InicioSOCIEDADEO Concello estuda limitar novos hoteis en edificios completos para frear a...

O Concello estuda limitar novos hoteis en edificios completos para frear a perda de vivenda no centro histórico

A alcaldesa mostra "convencemento" sobre o traballo realizado, mentres a oposición censura falta de proxectos e ideas

Publicado o

Xornal de Compostela

O Goberno local de Santiago de Compostela está a estudar a modificación dos requisitos para a implantación de establecementos de hospedaxe, como hoteis e hostais, en edificios completos co obxectivo de “impedir” que estes poidan desprazar o uso residencial. Este foi un dos anuncios principais realizados pola alcaldesa, Goretti Sanmartín, no debate do estado do municipio celebrado este xoves. A rexedora mostrou o seu convencemento de que o executivo traballa na “liña correcta” e aproveitou a súa intervención para censurar á oposición por pretender facer pasar por real un relato que, segundo afirmou, “os feitos desmenten”.

Pola contra, o PP, o PSOE e as concelleiras non adscritas coincidiron en criticar a xestión do bipartito de BNG e Compostela Aberta. O portavoz popular, Borja Verea, tachou a etapa de Sanmartín como de “resultados cero”, mentres que os socialistas e as non adscritas afearon ao goberno unha carencia de proxectos propios, asegurando que a maioría das actuacións actuais son “herdadas” do anterior mandato.

POLÍTICAS URBANÍSTICAS E DE “TRANSFORMACIÓN URBANA”

O anuncio respecto dos locais de hospedaxe enmarcou as políticas urbanísticas na protección do comercio e o asentamento da poboación no casco histórico. Sanmartín defendeu un modelo que manteña a “vitalidade das rúas” e evite o desprazamento do tecido comercial cara á periferia. Entre as medidas de transformación, destacou o concurso internacional para o Conector Central de Virxe da Cerca, que terá propostas finalistas o 20 de febreiro, e o avance de ordenanzas como a de convivencia ou a recuperación da rasante na rúa Castrón Douro.

APOSTA POLO GASTO SOCIAL

A tenente de alcaldesa, María Rozas, centrou parte do seu discurso na reivindicación do gasto social, que asegurou que se duplicou nunha década ata superar os 135 euros por habitante. Rozas destacou o novo contrato do Servizo de Axuda no Fogar (SAF), cifrado en 6,3 millóns de euros, e avanzou que a Xunta deu o visto definitivo para aumentar o número de licenzas de taxi, estancado desde 1998. Malia os logros, admitiu “debes” en áreas como o transporte urbano e a situación dos centros socioculturais, que figuran como os principais retos para este 2026.

PP: “CON GORETTI SANMARTÍN TODO FUNCIONA PEOR”

O voceiro municipal do PP, Borja Verea, cargou con dureza contra o Goberno local por gobernar “rematadamente mal” e ter a cidade “bloqueada”. Durante a súa intervención, os concelleiros populares levantaron carteis enumerando deficiencias en servizos como os autobuses, os taxis ou o radar de Conxo. Verea listou medidas que el mesmo executaría, como o derrube da Casa da Xuventude para abrir o paso ao parque de Belvís ou a mobilización de vivenda baleira para facer fronte á emerxencia habitacional.

NON ADSCRITAS REPROCHAN “POUCA OU NINGUNHA AUTOCRÍTICA”

Gonzalo Muíños, en representación das concelleiras non adscritas, afeou á alcaldesa unha intervención “desconectada da realidade”. Criticou a perda de fondos europeos para proxectos estratéxicos como o da Praza de Abastos e os peches reiterados do parque de bombeiros, sinalando que o goberno vive grazas aos proxectos que o anterior mandato deixou financiados ou xa proxectados.

O PSOE VE “PARÁLISE”

Pola súa banda, o portavoz do PSOE, Gumersindo Guinarte, asegurou que Santiago está “paralizada no que depende da xestión” e denunciou un grave deterioramento dos servizos básicos. Guinarte reprobou a falta de resultados en vivenda, cualificando de “espectáculo lamentable” a xestión da zona residencial tensionada, e sinalou o bloqueo do contrato de transporte público como un dos principais fallos do actual executivo.

ÚLTIMAS

O Sindicato de Vivenda de Compostela denuncia que unha manifestante ingresou no hospital tras unha agresión policial

O Sindicato de Vivenda de Compostela denunciou que varias participantes nas mobilizacións da folga...

O PSdeG abre a campaña en Santiago cun chamamento á mobilización para o 29-N

O PSdeG iniciou en Santiago a campaña para as eleccións xerais do 29 de...

O PP abre a campaña das xerais en Santiago e Verea chama a mobilizar o partido

O Partido Popular abriu esta noite en Santiago de Compostela a campaña das eleccións...

Buscas emprego na USC? A universidade anuncia 289 prazas públicas para profesorado e persoal de administración

A renovación dos cadros de persoal das universidades públicas constitúe un dos grandes retos...

O PSdeG abre a campaña en Santiago cun chamamento á mobilización para o 29-N

O PSdeG iniciou en Santiago a campaña para as eleccións xerais do 29 de...

O PP abre a campaña das xerais en Santiago e Verea chama a mobilizar o partido

O Partido Popular abriu esta noite en Santiago de Compostela a campaña das eleccións...

Pedro Sánchez participará nun acto electoral en Santiago o mércores 18 de novembro

O presidente do Goberno e candidato do PSOE ás eleccións xerais, Pedro Sánchez, visitará...