O portavoz do PP no Parlamento de Galicia, Alberto Pazos Couñago, cuestionou este domingo a manifestación celebrada en Santiago en defensa da sanidade pública e crítica coa xestión sanitaria do Goberno galego, ao considerar que a protesta responde a explicacións de carácter político máis que asistencial.
Segundo trasladou, a mobilización “ten moito máis que ver co partidista e o político que co sanitario”, unha valoración que realizou desde o Hospital Álvaro Cunqueiro, en Vigo, onde se desprazou á mesma hora que se desenvolvía a protesta na capital galega. Desde ese emprazamento, defendeu o sistema galego como “un dos mellores sistemas sanitarios do mundo”.
Pazos Couñago recoñeceu a existencia de dificultades no funcionamento da sanidade, mais vinculounas principalmente á falta de profesionais en determinadas especialidades, con especial incidencia en Atención Primaria e Pediatría. Ao seu xuízo, esta situación non é exclusiva de Galicia, senón que afecta ao conxunto das comunidades autónomas.
Nese sentido, afirmou que os gobernos autonómicos levan anos trasladando propostas ao Ministerio de Sanidade para tratar de paliar esta problemática sen obter, segundo indicou, respostas eficaces. “É un problema que estamos a sufrir todas as comunidades autónomas de España”, sinalou.
No marco destas declaracións, o portavoz popular estableceu unha diferenciación entre “os que prefiren o ruído, a pancarta e a algarada” e “os que prefiren a xestión, a proposta razoable e a procura de solucións”, encadrando ao PP neste último grupo. “Nós imos estar sempre deste segundo lado”, concluíu.
