A concelleira socialista Marta Abal afeou que o Concello de Santiago “aínda non remitiu ao Consello de Contas a Conta Xeral correspondente ao ano 2024”, o que podería ter “consecuencias graves” para o municipio, como a perda de subvencións e doutros recursos económicos “fundamentais”.
Así, Abal, tras lembrar que a documentación foi ratificada en pleno, manifestou que este mesmo luns solicitarán información ao goberno municipal para aclarar “por que non se remitiu a Conta Xeral, cando ten previsto facelo e cales son as consecuencias económicas xa coñecidas deste incumprimento”. Finalmente, a edil socialista lamenta que se deu esta situación cun goberno con “máis cargos directivos que nunca” e que pon “en risco” os recursos económicos da cidade.
