A concelleira do Grupo Municipal Socialista no Concello de Santiago, Marta Abal, manifestou o seu desacordo co anuncio do Goberno local sobre a instalación de novos radares fixos e dun semáforo con cámara na cidade. A edil asegurou que esta decisión “non responde a unha estratexia integral de seguridade viaria”, senón a unha política que, ao seu xuízo, “prioriza a sanción fronte á prevención e deseño seguro das rúas”.
As declaracións foron realizadas a través dun audio remitido aos medios de comunicación, no que Abal defendeu que a seguridade viaria debe basearse nunha “orde lóxica de actuación”. Segundo explicou, esa secuencia debería comezar polo deseño urbano das rúas, continuar cunha xestión intelixente do tráfico e accións de concienciación, e só incorporar a sanción en puntos concretos e conflitivos, sempre sustentada en datos públicos que avalen a súa necesidade.
Neste contexto, a concelleira socialista indicou que na actualidade “non consta a existencia dun estudo público e actualizado que xustifique a colocación destes dispositivos viarios”. Engadiu que, de existir esa documentación, o seu grupo solicita que “o Goberno a faga pública” para permitir unha avaliación transparente da medida.
Abal tamén puxo o foco na situación dalgunhas vías da cidade que, pese a contar con menor volume de tráfico e límites de velocidade máis reducidos, presentan unha maior perigosidade, especialmente “aquelas con alta presenza peonil”. Ao seu entender, estas circunstancias deberían ser prioritarias á hora de definir actuacións en materia de mobilidade e seguridade.
A edila lembrou ademais que a actual alcaldesa defendía no ano 2020 a necesidade de impulsar campañas de sensibilización e un cambio na política de mobilidade urbana. Por iso, cualificou de “contraditorio” que agora se aposte pola instalación de radares como medida principal, fronte a outras accións preventivas e educativas que daquela se consideraban esenciais.
Para concluír, Marta Abal sostivo que a seguridade viaria debe construírse con “planificación, datos e coherencia política”, e non a través do que definiu como “multas masivas”, reiterando a necesidade dun enfoque global e fundamentado para mellorar a mobilidade e a protección das persoas en Santiago de Compostela.
