O coordinador de UCIN Santiago de Compostela, Diego Adrián Mallo, alertou este martes da situación de falta de luz no parque de Belvís, que, segundo asegura, permanece totalmente ás escuras desde hai catro días. A formación indica que a incidencia se produce a partir das 18:00, coincidindo coa caída da tarde, momento no que “xa non se ve absolutamente nada” e no que a veciñanza que atravesa o espazo “ten que botar man das linternas dos móbiles para non caer ou simplemente para poder cruzar o parque”.
Mallo describe este escenario como “perigoso e inadmisible” nun punto de paso habitual para estudantes, traballadores e residentes que regresan ás súas casas ao rematar a xornada. A falta de iluminación, sinala, converte o percorrido en “un itinerario inseguro” que está a afectar o uso cotián do parque.
UCIN solicita ao Concello de Santiago que repoña de maneira inmediata o subministro eléctrico e que emprenda unha revisión xeral do estado da iluminación pública en todos os parques da cidade. “Non podemos permitir que un espazo público quede inutilizado e inseguro durante varios días sen ningunha explicación”, afirma Mallo.
A formación reclama tamén que o goberno local informe á cidadanía sobre as causas da incidencia e sobre os prazos previstos para a súa resolución, ao entender que a falta de comunicación engade incerteza a unha situación que afecta de maneira directa á mobilidade peonil na contorna de Belvís.
