UCIN Galicia abriu en Compostela un proceso de encontros con colectivos da cidade co obxectivo de recoller demandas e analizar o que define como un contexto de “parálise institucional e social” no Concello de Santiago. Segundo explica a formación, nas últimas semanas estableceron conversas con asociacións veciñais, entidades civís e representantes das Forzas e Corpos de Seguridade do Estado, co propósito de identificar prioridades e trasladar a crecente preocupación polo estado dos barrios.
O coordinador de UCIN Galicia, José Luis Calo, afirma que este traballo pretende articular vías de cooperación cos distintos actores locais. “Santiago necesita solucións reais. A prioridade é sumar, escoitar e crear espazos de colaboración que permitan desbloquear a cidade. Non se trata de ideoloxías, senón do benestar dos veciños”, indicou. Pola súa parte, o responsable de UCIN Santiago, Diego Adrián Mallo, apuntou á importancia de detectar os problemas máis urxentes: “Estamos nun punto decisivo. Non podemos quedar mirando mentres os problemas medran nos barrios. Queremos implicar a toda a cidadanía para construír unha cidade máis segura, limpa e funcional”.
A formación asegura que entre os asuntos máis reiterados nos encontros figuran seguridade, limpeza viaria, mobilidade, convivencia e mantemento urbano, ámbitos nos que detectan unha demanda clara de reforzo na xestión municipal. Segundo o seu balance provisional, as entidades consultadas expresan a necesidade de recuperar un diálogo estable co Concello para atender problemas cotidianos que, ao seu xuízo, levan tempo sen resolverse.
Froito desta ronda de contactos, UCIN Galicia anunciou que convocará nos próximos días unha mobilización aberta á cidadanía e aos colectivos sociais da cidade. A organización explica que o obxectivo é reclamar unhas “institucións próximas, eficaces e responsables”, e chama á participación dos veciños para facer visible o seu malestar. “Só coa forza conxunta dos nosos veciños poderemos esixir as solucións que Santiago merece”, afirmou Calo, quen subliñou que a convocatoria terá carácter pacífico e orientado a promover un debate construtivo.
UCIN tamén anima ás asociacións culturais, veciñais e sociais a seguir a información a través dos seus canais oficiais, ao tempo que mantén aberto o proceso de recollida de achegas co que pretende perfilar o seu diagnóstico sobre a situación da cidade.
