O PSdeG presentou este xoves unha emenda aos orzamentos da Xunta para 2026 coa que busca incrementar en 2,4 millóns de euros a achega autonómica ao Consorcio de Santiago, mantida en 3,1 millóns desde o ano 2021. O deputado socialista Aitor Bouza defendeu esta proposta nunha rolda de prensa en Compostela, onde subliñou que o Consorcio precisa máis recursos para atender as súas funcións, en especial as axudas á rehabilitación de vivenda no casco histórico.
Bouza lembrou que o organismo está sustentado por varias administracións, entre elas a Xunta, e advertiu de que os fondos actuais son insuficientes tanto para o funcionamento ordinario como para afrontar actuacións de rehabilitación. Segundo explicou, “non se pode esixir ao Consorcio que cumpra coas súas funcións se non dispón dos medios económicos precisos”, razón pola que instou ao Goberno galego a “comprometerse especificamente con esta cidade”.
O parlamentario enmarcou esta emenda na estratexia socialista para abordar a problemática da vivenda desde unha perspectiva ampla, que inclúa tanto a construción como a activación do parque existente. Destacou que o reforzo das partidas permitiría “poñer en circulación vivenda baleira e atender inmobles que precisan intervencións urxentes no casco histórico”, algo que —segundo indicou— reclaman asociacións veciñais e colectivos que viven nesta zona de Compostela.
O PSdeG agarda que a Cámara galega avale a modificación orzamentaria no último pleno do mes, e dirixe unha chamada directa ao deputado popular Borja Verea, presidente do PP compostelán, para que “vote a favor dos intereses da veciñanza”. Bouza advertiu, con todo, que en anos anteriores o grupo popular rexeitou todas as emendas relativas a Santiago, polo que anunciou que a proposta se presentará tamén como iniciativa específica para forzar un posicionamento claro no Parlamento.
O deputado criticou ademais que o Goberno local non reclame con firmeza este incremento, ao considerar que a confrontación coa Xunta “debe producirse cando está en xogo unha demanda real da cidade”, como o financiamento do Consorcio. “O obxectivo final é que as persoas se poidan beneficiar das axudas e que a vivenda rehabilitada regrese ao mercado”, afirmou.
Durante a quenda de preguntas, Bouza referiuse tamén á votación municipal sobre o pago de facturas pendentes e á situación da empresa Viaqua. Subliñou que a posición do PSdeG non variou desde que formaba parte do Goberno: “cando corresponde pagar por servizos prestados, hai que facelo”. Criticou que nalgúns casos se empregasen votos en contra como medida de presión, e advertiu de que “non se pode utilizar ás familias e á veciñanza para facer política”.
Bouza concluíu reivindicando a necesidade de que Santiago “volva ser unha cidade onde a xente poida vivir e non teña que marchar ás vilas limítrofes”, algo que, ao seu xuízo, require medidas integrais en materia de vivenda e un compromiso económico máis decidido por parte da Xunta.
