O Grupo Municipal Socialista trasladará ao Pleno de novembro a súa preocupación pola ausencia de avances nas melloras de seguridade viaria en Laraño, unha zona do rural compostelán onde, segundo denunciaron, a veciñanza leva tempo alertando dunha situación de risco sen que o Goberno local adoptase medidas concretas.
O voceiro socialista, Gumersindo Guinarte, lembrou que os residentes do lugar veñen advertindo dende hai meses dos perigos existentes nos viais e dos incidentes recorrentes que afectan tanto a vehículos como a persoas. Segundo explicou, o Executivo municipal anunciara o pasado 17 de setembro a petición de informes á Policía Local e á Garda Civil para avaliar a sinistralidade, mais “a veciñanza segue sen saber nada e non se aplicou ningunha mellora real no territorio”.
Guinarte sostén que esta falta de avances evidencia unha “falla absoluta de prioridade política” e que, dous meses despois do anuncio, non se coñece o resultado dos informes nin ningunha planificación municipal. Ante esta situación, o PSdeG solicitará no Pleno acceso ao contido dos documentos e pedirá claridade sobre as actuacións previstas.
“Imos preguntar que conclúe ese informe e, sobre todo, que actuacións está executando o goberno da señora Sanmartín. Porque non abonda con anunciar estudos, cómpre actuar, tomar decisións, reforzar a seguridade dos viais e ofrecer respostas inmediatas a un problema que afecta á vida cotiá da xente”, indicou Guinarte, insistindo na necesidade de introducir melloras urxentes.
O portavoz socialista tamén advertiu de que o Concello está desatendendo unha demanda esencial da cidadanía. “Laraño non pode seguir agardando. É responsabilidade do Concello garantir a seguridade da súa veciñanza. O que pedimos é simple, transparencia, planificación e medidas efectivas. A seguridade da cidadanía non admite máis atrasos”, concluíu.
