A concelleira popular María Baleato pediu este martes ao Executivo municipal de Santiago que se pronuncie sobre os incidentes rexistrados o 25 de novembro diante da sede do Partido Popular na rúa compostelá onde traballan as súas empregadas. A petición chega un día despois de que parte do persoal permanecese no interior das instalacións acompañado por efectivos da Policía Nacional, ante a previsión de que a marcha convocada pola CIG rematase fronte ao edificio.
Baleato sostivo que o sucedido foi “esperpéntico” e “fóra de lugar”. Segundo relatou, varias traballadoras tiveron que continuar a súa xornada “custodiadas por axentes” ao terse difundido nos días previos carteis do sindicato que situaban o final da mobilización diante da sede popular. “O vivido onte foi esferpéntico e estivo fóra de lugar. Tivemos que traballar custodiadas porque unha manifestación convocada pola CIGA, sorprendentemente a favor dos dereitos das mulleres, tivo como obxectivo protestar ante varias traballadoras do Partido Popular que só estabamos a cumprir as nosas funcións”, declarou esta mañá.
A concelleira incidiu en que, ao seu xuízo, “unha manifestación contra a violencia non debería xerar en ningún caso máis violencia, nin sequera verbal”, polo que instou ao Goberno local, en mans do BNG, a que fixe unha posición pública sobre se considera “normal” o ocorrido. “Pedimos ao Goberno nacionalista de Santiago que condene a actitude do sindicato CIGA e se manifeste sobre se lles parece normal o acontecido”, afirmou.
Segundo o relato ofrecido este luns polo PP compostelán, o acceso ao edificio viuse parcialmente restrinxido pola presenza policial, unha situación que cualificaron de “anómala” e que xerou “preocupación” entre as empregadas que estaban de servizo. A formación definiu como “total incoherencia” que unha protesta en defensa dos dereitos das mulleres finalizase diante dun centro de traballo onde se atopaban varias traballadoras.
