A situación dos servizos de extinción de incendios continúa no centro da discusión pública tras facerse visibles unhas mensaxes privadas que un bombeiro comarcal enviou ao portavoz do PP en Santiago, Borja Verea, a través de Instagram. O autor das mensaxes, que divulgou o seu contido na rede social X, cuestiona que o dirixente popular evitase responderlle malia o discurso crítico que mantén contra o Goberno local pola recente incidencia de Pontepedriña.
Estes son os DMs que lle mandei a @borja_verea. Son educados, non? Por que non respondeu e me deixou de seguir? Se é unha persoa moi preocupada polos servizos de bombeiros. pic.twitter.com/RFQHkvLiR1
— Bombero Comarcal Gz (@BomberoComarcal) November 19, 2025
O episodio chegaba esta pasada semana, poucos días despois de que Verea cualificase de “crítica” a situación do parque municipal compostelán, asegurando que o incendio dunha vivenda o pasado sábado deixase o servizo “inoperativo por primeira vez na historia”. O portavoz responsabilizou directamente á alcaldesa, Goretti Sanmartín, e pediu a súa dimisión en reiteradas ocasións, ao entender que a cidade queda “en risco” cando se producen intervencións simultáneas que requiren reforzos doutras quendas.
AS CRÍTICAS DENDE OS CONSORCIOS
Nas mensaxes dirixidas ao portavoz popular, o bombeiro agradece inicialmente e con retranca o seu interese pola situación en Santiago, pero expón de inmediato as súas propias preocupacións: a precariedade estrutural dos parques comarcais, dependentes dos Consorcios Provinciais, e cuxa xestión —lembra— recae maioritariamente en administracións gobernadas polo PP. Segundo indica, en lumes equivalentes ao de Pontepedriña “imos 3 bombeiros ou un día excepcional 4”, unha cifra que considera insuficiente e que é menor que a do incendio de Santiago.
O profesional formula unha comparativa directa coa denuncia trasladada por Verea ao Concello compostelán: se o portavoz popular considera “unha temeridade” o ocorrido en Santiago, nos Consorcios —afirma— a realidade é “un suicidio”.
A partir desta idea, insta ao dirixente do PP a estender publicamente esa mesma crítica aos responsables do sistema comarcal, en particular ao presidente da Xunta, Alfonso Rueda, a quen identifica como “principal ideólogo” do modelo cando ocupaba responsabilidades previas en Administración Local.
Tamén lle solicita apoio no proceso xudicial que asegura ter iniciado contra o Consorcio de Ourense por unha presunta vulneración de dereitos fundamentais, ao entender que a falta de efectivos durante unha vaga de incendios xerou riscos severos para as brigadas. Nas mensaxes menciona ao presidente da Deputación de Ourense, Luis Menor, e ao delegado territorial da Xunta, Diego Calvo, a quen responsabiliza das condicións actuais.
UNHA POLÉMICA QUE SEGUE VIVA TRAS O PLENO DO VENRES
A publicación destas mensaxes coincidiu coa preparación do pleno extraordinario no que se abordou o expediente para pagar máis de 2 millóns de euros en horas extra de bombeiros e Policía Local. Verea sostivo que este procedemento “roza a ilegalidade” e que os informes técnicos revelan o “mal funcionamento” do Goberno municipal. O executivo, pola súa banda, apoiado no pleno polos votos a favor do PSOE, defendeu que se trata dun paso necesario para actualizar pagos acumulados e garantir o servizo.
