O secretario xeral de Vivenda e Urbanismo, Heriberto García Porto, negou que exista por parte da Xunta de Galicia ningún “boicot” ás declaracións de mercado tensionado e responsabilizou ao Concello de Santiago de non ter completado correctamente a súa solicitude. Así o manifestou este xoves na Comisión de Ordenación Territorial, Obras Públicas, Medio Ambiente e Servizos, en resposta a unha pregunta formulada polo BNG, que aludiu á situación de Compostela e da Coruña —esta última xa recoñecida como mercado tensionado—.
“Non estamos de acordo e non as declararemos de oficio”, afirmou García Porto, que insistiu en que, ao seu xuízo, este tipo de declaracións “non favorecen o acceso á vivenda”. Con todo, asegurou que a Xunta si as aprobará cando os concellos o soliciten correctamente, presentando “toda a documentación adecuada”.
Neste sentido, indicou que o Concello de Santiago non cumpriu os requisitos e que a súa petición foi “incompleta”. “A responsabilidade non é da Xunta, débese ao traballo e á actitude do propio Concello”, afirmou, engadindo que o Goberno local non respondeu ás peticións de reunión nin achegou o proxecto de plan específico que debía acompañar a solicitude. “Se houbese ese encontro, posiblemente estaría coa declaración aprobada”, engadiu o secretario xeral.
García Porto defendeu tamén a actuación da Xunta en relación co plan estatal de vivenda, fronte ás críticas da deputada do BNG Alexandra Fernández, que denunciou a perda de financiamento estatal. “Non rexeitamos o cofinanciamento, pero se achegamos un 40% queremos que se nos facilite a participación, tanto da Xunta como do sector”, respondeu o representante autonómico.
O secretario xeral rexeitou que o Executivo galego estea a pór trabas aos concellos. “Para vostede regular un procedemento é poñer trabas”, replicou á deputada nacionalista, lembrando que no caso da Coruña a declaración como mercado tensionado tramitouse en dous meses. “Pedimos que se acreditase cal era a situación”, apuntou, en referencia ao parque de vivendas e ás actuacións previstas en materia de rehabilitación no caso compostelán.
Pola súa parte, Alexandra Fernández acusou á Xunta de actuar seguindo “directrices de Xénova”, en alusión á postura do Partido Popular a nivel estatal. “Están a bloquealo, rexeítano por pura oposición política aos concellos”, asegurou, advertindo que Galicia “perderá axudas estatais” destinadas especificamente ás zonas declaradas como tensionadas.
A deputada insistiu en que Santiago cumpre os criterios establecidos pola lei estatal e que a Xunta “se inventa que falta documentación” para xustificar a negativa. “Están a facer o que dixo Xénova que fixesen, e imos perder financiamento”, recalcou, urxindo ao Executivo galego a aprobar a declaración e garantir o acceso á vivenda nas áreas onde os prezos están a subir de maneira significativa.
