O Grupo de Acción Feminista do BNG de Santiago celebrará este xoves 13 de novembro ás 19:00 na Casa Xohana Torres un encontro coa maxistrada Paz Filgueira, unha das principais especialistas galegas en materia de violencia machista dende o ámbito xudicial. A actividade forma parte do calendario de accións que o Bloque organiza en vésperas do Día Internacional da Eliminación da Violencia contra as Mulleres, o vindeiro 25 de novembro.
A coordinadora do grupo feminista do BNG compostelán, Concha de la Fuente, destacou que “a xustiza ten un papel moi relevante á hora de contribuír á eliminación da violencia contra as mulleres” e que o obxectivo deste encontro é “escoitar a unha muller que, dende a súa condición de maxistrada, aposta por facer da xustiza unha ferramenta contra o machismo e non un atranco para as mulleres nas súas loitas”.
Paz Filgueira, actualmente maxistrada do Xulgado de Instrución número 3 de Santiago, con competencias en violencia sobre a muller, iniciou a súa carreira hai 25 anos e exerceu durante case unha década como titular do Xulgado de Violencia sobre a Muller de Vigo. Ademais da súa traxectoria profesional, conta con formación acreditada polo Consello Xeral do Poder Xudicial nas áreas penal e laboral, e unha longa experiencia en docencia e coordinación de programas sobre igualdade e violencia de xénero.
Ao longo da súa carreira, Filgueira coordinou a Comisión de Violencia de Xénero da Asociación de Xuízas e Xuíces para a Democracia, participou na formación de corpos policiais e persoal da Administración e formou parte da Comisión de Igualdade e Estudos Feministas do Consello da Cultura Galega. O seu compromiso levouna a recibir recoñecementos como os premios Peña Novo, Fademur, Ernestina Otero ou Meninas da Delegación do Goberno.
Dende o pasado mes de outubro, Filgueira integra tamén a Rede de Especialistas en Igualdade do Consello Xeral do Poder Xudicial, reforzando así o seu papel como referente na defensa dos dereitos das mulleres e na loita contra a violencia machista dende o eido xudicial.
