O secretario xeral do PSdeG en Santiago, Aitor Bouza, anunciou esta mañá que o seu grupo levará ao Parlamento de Galicia e ao Pleno municipal novas iniciativas para reclamar á Xunta de Galicia o cumprimento dos compromisos adquiridos en 2024 respecto á construción dun novo aparcadoiro no Hospital Clínico Universitario de Santiago (CHUS).
Segundo explicou Bouza, o protocolo asinado entre administracións comprometía o inicio das obras en 2026, mais o estudo previo de viabilidade, licitado pola Xunta no pasado mes de agosto, ten un prazo de doce meses, o que, na súa opinión, “impide que o proxecto arrinque nos prazos previstos”. “A dous meses de rematar o 2025, é evidente que o compromiso non se vai cumprir”, sinalou.
O dirixente socialista acusou á Xunta de dar “unha nova patada para adiante” e criticou tamén o “silencio” do Concello de Santiago, ao que pediu “esixir á Xunta que cumpra cos veciños e veciñas da cidade”. Bouza insistiu en que a falta dun espazo axeitado de estacionamento “dificulta o acceso das persoas usuarias, moitas delas con problemas de mobilidade”, e lembrou que “o transporte público ao hospital é xa un auténtico galimatías”.
Durante a súa intervención, o portavoz compostelán defendeu que o futuro aparcadoiro “é unha infraestrutura prioritaria e urxente” que debe “mellorar o acceso e reducir o estrés das persoas que acoden ao hospital”, tal e como recollía o propio estudo de mobilidade da Xunta. “De nada serve facer plans se non se van cumprir”, advertiu, reclamando transparencia nos acordos e coñecer as condicións do futuro convenio entre institucións.
O SERGAS NEGA O COLAPSO DE URXENCIAS DO CHUS
Preguntado sobre a situación actual nas urxencias do CHUS, Bouza cualificou de “decepción absoluta” as palabras do xerente do Sergas, que negou o colapso asistencial, e asegurou que se trata “dun problema estrutural pola falta de planificación da Xunta”.
SITUACIÓN NO GOBERNO LOCAL
Finalmente, o líder socialista compostelán tamén valorou a situación política no Concello, que definiu como de “desgoberno absoluto”. “Cada semana hai unha nova crise e non se avanza nos proxectos de cidade: nin no contrato da auga, nin no párking do hospital, nin noutros servizos esenciais”, afirmou, pedindo á alcaldesa Goretti Sanmartín “máis diálogo, máis traballo e menos confrontación”.
