O Grupo Municipal Socialista de Santiago puxo en valor a aprobación plenaria da súa proposta para crear un sistema municipal de verificación da accesibilidade nas actuacións que se realicen nos espazos públicos da cidade. A iniciativa, explican, busca garantir que todas as obras municipais cumpran coa normativa vixente e que se detecten de forma anticipada posibles deficiencias que dificulten a mobilidade das persoas.
A concelleira socialista Marta Abal explicou que o obxectivo é implantar “un sistema estable e sinxelo que asegure que todas as intervencións municipais no espazo público se axusten ás condicións de accesibilidade”. Este control abranguerá desde a fase de deseño ata o mantemento final das obras, e incluirá a participación das entidades representativas das persoas con discapacidade, que poderán colaborar na avaliación das actuacións.
Abal lembrou que durante o anterior mandato o goberno socialista impulsara un proxecto específico de mellora da accesibilidade, reservado a centros especiais de emprego e empresas de inserción, que permitiu executar 29 intervencións en distintos puntos da cidade. Con este novo sistema, o grupo socialista considera que Santiago consolida ese camiño e “dá un paso máis” na integración dos criterios de accesibilidade como requisito obrigatorio en todas as actuacións municipais.
Entre os aspectos que se revisarán, destacan elementos como os desniveis das beirarrúas, a anchura dos pasos de peóns, a colocación das bandas táctiles ou os tempos dos semáforos, aspectos que, segundo Abal, “adoitan pasar desapercibidos pero teñen un impacto directo na autonomía das persoas”.
A edil subliñou que esta medida beneficiará non só ás persoas con discapacidade, senón tamén ás persoas maiores, ás familias con carriños e, en xeral, a toda a cidadanía. “Con esta iniciativa, Santiago dá un paso importante cara a unha cidade máis accesible, máis amable e máis xusta para todas e todos”, concluíu.
