O conselleiro de Presidencia, Xustiza e Deportes, Diego Calvo, instou á alcaldesa de Santiago, Goretti Sanmartín, a “tentar solucionar canto antes” a situación no servizo de extinción de incendios, con denuncias de falta de persoal e decisión do persoal de non reforzalo a través de horas extra.
“O servizo de extinción de incendios corresponde aos concellos cando superan os 20.000 habitantes e menos de 20.000 ás deputacións”, aseverou a preguntas dos xornalistas nun acto no Banco de Alimentos da provincia da Coruña. “Outra cousa é que a Xunta non mire para outro lado e se implique”, sentenciou en alusións aos consorcios provinciais. No entanto, insistiu en que no caso de Santiago hai que “chegar canto antes” a un acordo.
“A situación é preocupante, levamos anos esperando pola comarcalización do parque de bombeiros de Santiago”, recalcou para asegurar que a Xunta e a Deputación comprometéronse coa dotación e o mantemento pero que non houbo avances durante a etapa de goberno local socialista. Agora, emprazou á nova rexedora a buscar unha solución “canto antes polo ben de todos”.
