O concelleiro de Servizos Básicos de Santiago de Compostela, Xesús Domínguez, informou este venres dos avances da Comisión especial da auga, o órgano encargado de estudar cal debe ser o modelo máis sustentable e eficiente para a xestión do servizo municipal de abastecemento e saneamento.
Segundo explicou Domínguez, a comisión está composta por representantes de todos os grupos municipais e por persoal técnico das áreas implicadas. O edil subliñou que o debate se centra actualmente en dous modelos alternativos: por unha banda, o concesional, baseado nun informe elaborado no anterior mandato por unha consultora; e, pola outra, unha empresa mixta con maioría pública, proposta a partir do estudo da Cátedra da Auga da Universidade da Coruña, presentado na sesión deste venres.
“A disxuntiva está entre un modelo concesional, no que o control se sitúa nunha empresa privada durante un período extenso de anos, e outro no que se crea unha empresa mixta con maioría pública, na que o control permanece na Administración Municipal”, explicou o concelleiro.
Domínguez insistiu en que a decisión final deberá adoptarse no Pleno e destacou que se trata dunha “oportunidade única non só para resolver unha situación administrativa, senón tamén para mellorar a xestión integral do ciclo da augae afrontar os problemas estruturais da rede de abastecemento e saneamento en todo o municipio”.
O edil compostelán defendeu que o novo modelo deberá ter como eixo fundamental a eficiencia e a sustentabilidade, tanto na planificación como na prestación dun servizo que cualificou de esencial “para a vida da veciñanza, o medio e a economía local”.
